Qazaqstandyqtar qashan Ońtústik Koreıada zańdy jumys isteı alady

ASTANA. KAZINFORM – Qazaqstandyqtardyń Ońtústik Koreıada zańdy túrde jumysqa ornalasýǵa múmkindik beretin ońtústikkoreıalyq «Employment permit system» júıesine qosylý protsesi bıyl aıaqtalýy múmkin. Bul týraly Eńbek jáne halyqty áleýmettik qoldaý mınıstrligi Memlekettik eńbek ınspektsııasy komıtetiniń tóraǵasy Erbolat Ábilhatın aıtyp berdi. 

Tilshiler ońtústikkoreıalyq «Employment permit system» júıesine Qazaqstannyń tirkelý protsesi qaı kezeńde turǵanyn surady.

− Ótken jyly Qazaqstanda kóshi-qon saıasatynyń tujyrymdamasy qabyldandy, onyń maqsattarynyń biri − qazaqstandyqtarǵa shetelde jumysqa ornalasýǵa jáne zańdy eńbek etýine múmkindik berý. Osy baǵytta birqatar eldermen kelisim jasasý jumystary júrgizilýde. Ótken jyly Qatarmen qazaqstandyqtardy jumysqa ornalastyrý jóninde kelisimge qol qoıyldy. Sondaı-aq, Ońtústik Koreıamen de aýqymdy jumys júrgizildi, − dedi Erbolat Ábilhatın Úkimet úıinde ótken brıfıngte.

Onyń aıtýynsha, qazaqstandyqtar, ásirese eldiń ońtústik óńirleriniń turǵyndary buǵan zor qyzyǵýshylyq tanytyp otyr.

− Ókinishke qaraı, olar qazir Ońtústik Koreıada zańsyz jumys istep júr. Bizdiń maqsatymyz — olardyń eńbegin zańdastyrý. Qazaqstan tarapynan Syrtqy ister mınıstrligi tıisti usynystardy Ońtústik Koreıaǵa joldady. Alaıda, bul elde úkimet aýysqannan keıin protsess sál baıaýlady. Degenmen, jańa úkimet pen prezıdenttiń kelýin eskere otyryp, byltyr bastalǵan jumys bıyl aıaqtalady dep oılaımyn. Bul protsess Qazaqstanǵa emes, tolyqtaı Ońtústik Koreıa úkimetiniń sheshimine baılanysty, − dep túsindirdi mınıstrlik ókili.

Aıta keteıik, búgingi Úkimet otyrysynda óndiriste qaýipsiz eńbek jaǵdaılaryn qamtamasyz etý jáne eńbek salasyn tolyq tsıfrlandyrý taqyryby qaraldy.

Elimizde Eńbek qaýipsizdigi mamandaryn daıarlaıtyn oqý ortalyǵy ashylady.