Qazaqstandyqtar qansha ýaqytyn jolǵa jumsaıdy — taldaý
ASTANA. KAZINFORM — Bıyl Qazaqstan jolda júrý boıynsha Numbeo reıtınginde 89 eldiń arasynda 47-orynǵa turaqtady. Bizdiń eldiń ındeksi — 134,9 ball. Bul týraly Finprom.kz resýrsy taldaý jasaǵan.
Reıtıng elderdi birneshe kórsetkish boıynsha salystyrǵan:
— Ýaqyt ındeksi, ıaǵnı adamdar ortasha eseppen bir núktege jetýge nemese bir núkteden kelýge qansha ýaqyt jumsaıdy;
— CO₂ shyǵaryndylarynyń ındeksi, ıaǵnı bir sapar barysynda qaldyqtyń kólemi;
— Tıimdilik ındeksi, ıaǵnı kólik júıesiniń tıimdiligin baǵalaý. Turǵyndar qoǵamdyq kólikten góri jeke kólikti tańdaıdy nemese jolǵa tym kóp ýaqyt jumsaýǵa májbúr.
Jolda kóp ýaqytyn ótkizetin elder reıtınginde Qazaqstan 41 oryndy ıelendi. Qazaqstanda sapardyń ortasha uzaqtyǵy 35,5 mınýtty quraıdy. TMD elderiniń ishinde Reseı (43,3 mınýt), Ázerbaıjan (40,6 mınýt) jáne Ýkraına (37,9 mınýt) turǵyndary mejeli jerge uzaq jetedi. Armenııa (29,3 mınýt) jáne Belarýs (31,2 mınýt) turǵyndary jolǵa az ýaqyt jumsaıdy.
Álemde Nıgerııa turǵyndary (65,3 mınýt) eń kóp ýaqytyn jolda ótkizedi, al Islandııa halqy mejeli jerge jyldam jetedi (21,4 mınýt).
Jolda CO₂ shyǵaryndylarynyń deńgeıi boıynsha Qazaqstan álemde 89-dan 47-shi oryndy ıelendi. Elimizde bir jerge baryp kelýge 3,9 keli kómirqyshqyl gazy ketedi.
Eń joǵary kórsetkishter Kosta-Rıka men Ońtústik Afrıkada (árqaısysy 9,5 kg), sondaı-aq Lıvanda (9,3 kg) tirkeldi. Shyǵaryndylardyń eń tómengi deńgeıi Albanııada (1,5 kg), Fınlıandııada (1,6 kg) jáne Avstrııada (1,6 kg) baıqaldy.
TMD elderiniń ishinde kólikten aýanyń eń kóp lastanýy Ázerbaıjan men Reseıde (árqaısysy 4,2 kg), sondaı-aq Ýkraınada (3,9 kg) baıqalady. Eń tómengi kórsetkish Armenııada (2,7 kg) jáne Belarýs elinde (3,3 kg) tirkeldi.
Byltyr Qazaqstanda qorshaǵan ortany qorǵaýǵa 52,8 mlrd teńge ınvestıtsııa quıyldy, bul qarajat 2023 jylǵa qaraǵanda 74,9%-ǵa az.
Óńirler boıynsha eń kóp ınvestıtsııa Pavlodar oblysyna tıesili 15,3 mlrd teńge, odan keıin Qaraǵandy (12,9 mlrd teńge) jáne Atyraý (7,3 mlrd teńge) oblysy ornalasqan.
Qarjylandyrýdyń negizgi kózi, ıaǵnı 93,8% kásiporyndardyń jeke menshiginen. Banktik kredıtterdiń kólemi 1,6 mlrd teńgeni qurady.
Aıta ketsek, qazir elimizde 3,6 myń shaqyrym avtojol aqyly negizde qyzmet etedi. Al jyl sońyna deıin bul kórsetkish 4 myń shaqyrymǵa deıin uzarmaq.