Qazaqstandyqtar qandaı ekologııalyq problemalarǵa jıi shaǵymdanady

ASTANA. KAZINFORM — Ekologııalyq problemalar boıynsha jıi shaǵym túsetin óńirler qatarynda Shymkent qalasy, Aqmola oblysy jáne Ulytaý oblysy tur. 

Bul týraly Ekologııa jáne tabıǵı resýrstar mınıstri Erlan Nysanbaev málim etti.

— Qoǵamdyq keńistik pen qorshaǵan ortanyń jaı-kúıin baqylaýdy uıymdastyrý sheńberinde tsıfrlandyrý tehnologııalary sátti paıdalanylyp jatyr. Ótken jyly iske qosylǵan @TazaQazBot telegramm-chat-boty turǵyndarǵa ekologııalyq problemalar men abattandyrý máselelerin tez sheshýge úlesin qosa alatynyn kórsetti. Bıyl 11 myńnan astam ótinim tústi, qazir 10 myń ótinim qaralyp, oryndaldy. Eń jıi kóteriletin máselelerdiń ishinde aýmaqtardy tazalaý (2963) qoqysty shyǵarý (662), kóshelerdi abattandyrý men trotýarlardy kútip ustaý (607) máseleleri bar, — dedi Erlan Nysanbaev Úkimet otyrysynda.

Sondaı-aq mınıstr portalda azamattar ótiniminiń sapasyz nemese tolyq oryndalmaǵany týraly shaǵym túsip jatqanyn aıtyp otyr. 

— Mysaly, Jetisý oblysynda árbir altynshy shaǵym ákimdikke túsedi. Shaǵymdardyń deni Shymkent qalasy, Aqmola oblysy jáne Ulytaý oblysynda oryndalyp jatyr. Ótinimderdi qaraýdan negizsiz bas tartý deregine jeke toqtalǵym keledi. Mysaly, Almaty qalasy boıynsha ruqsat etilmegen qoqys úıindileri týraly 7 ótinish ákimdikpen Polıtsııa basqarmasyna joldanǵan. Ruqsat etilmegen qoqys úıindilerin joıý ákimdikterdiń tikeleı mindeti jáne olardyń ókilettigi sheńberinde oryndalýy tıis, — deıdi vedomstvo basshysy.

Aıta keteıik, bıyl «Taza Qazaqstan» ekologııalyq aktsııasynda 189 myń tonna qoqys jınalyp, 2 mln aǵash otyrǵyzyldy.