Qazaqstandyqtar qaldyqtardy ótkizip, syıaqy ala alady
ASTANA. KAZINFORM — Qazaqstanda azamattarǵa qaldyqtardy qaıta óńdeýge ótkizip, syıaqy alýǵa múmkindik beretin EcoQolday tsıfrlyq júıesi jumys isteıdi. Bul týraly QR Ekologııa jáne tabıǵı resýrstar vıtse-mınıstri Jomart Álıev málimdedi.
Onyń aıtýynsha, EcoQolday — halyqty qaldyqtardy bólek jınaý men qaıta óńdeýge tartýǵa arnalǵan tsıfrlyq quraldardyń biri.
— Kez kelgen azamat júıege tirkele alady. Eger ol plastık, makýlatýra, metall synyqtary nemese kúndelikti turmysta jınalatyn ózge de qaldyqtardy jınasa, olardy ótkizip, belgili bir mólsherde tólem ala alady. «Jasyl damý» AQ turmystyq qatty qaldyqtardy jınaý, suryptaý jáne qaıta óńdeý júıesin qoldaýdy qamtamasyz etedi, — dedi Jomart Álıev ReStart ekologııalyq jobasynyń mereıtoılyq maýsymynyń qorytyndysyna arnalǵan is-shara aıasynda jýrnalısterge.
Vıtse-mınıstrdiń sózinshe, joba azamattar men bıznestiń qaldyqtardy qaıta óńdeýge belsendi qatysýyn yntalandyrýǵa baǵyttalǵan.
Mysal retinde ol qaldyqtarmen jumys isteýdiń tolyq tizbegin qalyptastyrǵan kompanııany atady. Mundaı kásiporyndar qaldyqtardy bólek jınaýdan bastap, tasymaldaý, suryptaý jáne qaıta óńdeýge deıingi barlyq kezeńdi qamtıdy.
Jomart Álıevtiń aıtýynsha, organıkalyq qaldyqtardy qaıta óńdeý nátıjesinde tyńaıtqysh retinde paıdalanylatyn gýmýs óndiriledi. Al plastıkten jańa ónim shyǵarýǵa qajetti túıirshikter daıyndalady.
Buǵan deıin Astanada ReStart ekologııalyq jobasynyń onynshy mereıtoılyq maýsymy qorytyndylanǵan edi.
Aıta ketelik qaldyqtardy esepke alý men baqylaý biryńǵaı tsıfrlyq júıege kóshiriledi.
