Qazaqstandyqtar qalaǵan valıýtasyn bırjadan nege tikeleı satyp ala almaıdy

ASTANA. KAZINFORM — Qazaqstan qor bırjasynyń (KASE) basqarma tóraǵasy Ádil Muhamedjanov qazaqstandyqtar qalaǵan valıýtasyn bırjadan jeke brokerlik shot arqyly nege satyp ala almaıtynyn aıtty.

— Jeke tulǵalar bırjadan jeke brokerlik shot arqyly valıýtany tikeleı satyp alsa tamasha bolar edi. Qazir ondaı múmkindik joq. Osy baǵytta jumys júrgizip jatyrsyzdar ma, — dep surady jýrnalıst Qazaqstan qor naryǵynyń 6 aıdaǵy kórsetkishi týraly baspasóz máslıhatynda.

KASE basshysy ázirge ondaı josparlary joq ekenin aıtty.

— Bul baǵytta jumys bastaý josparda joq. Jeke tulǵalarmen tikeleı iskerlik qarym-qatynas ornatýdy tipten qarastyryp otyrǵan joqpyz. Bizdiń seriktesterimiz — naryqtaǵy kásibı oıynshylar. Biz túpkilikti klıentpen solar arqyly saýda jasaımyz. Árıne túpkilikti klıentterimizdiń qalaýy men qajettiligi biz úshin mańyzdy. Óıtkeni brokerlik uıymdarmen, banktermen jumys isteıtin ınfraqurylym men quraldardy túpkilikti klıentterdiń qalaýyna qaraı qalyptastyramyz. Bul bankter men brokerlik uıymdardyń túpkilikti klıentterge tıisti qyzmet kórsetýine jaǵdaı jasaıdy, — dedi Ádil Muhamedjanov.

Buǵan deıin Ulttyq bank tóraǵasy Tımýr Súleımenov Ulttyq banktiń KASE men AIX-ti biriktirý boıynsha ustanymyn túsindirgen edi.