Qazaqstandyqtar ınternet-dúkenderde bank kartasynyń derekterin engizbeı-aq tólem jasaı alady
ASTANA. KAZINFORM – Biryńǵaı QR men telefon nómiri arqyly bankaralyq aýdarymdardan keıin qazaqstandyqtarǵa onlaın tólem jasaýǵa arnalǵan taǵy birneshe jańa servıs iske qosylady. Bul týraly Ulttyq bank tóraǵasynyń orynbasary Bınur Jálenov málim etti.
19 shildeden bastap ekinshi deńgeıli bankterdiń barlyǵy Bankaralyq mobıldi tólemder júıesine (BMTJ) qosylýǵa mindetti. Osydan keıin 2026 jyldyń sońyna deıin júıede taǵy tórt jańa servıs iske qosylatyn bolady. Sonyń biri – marketpleısterde satyp alǵan taýardyń aqysyn QR arqyly tóleý múmkindigi.
– Munyń basty artyqshylyǵy – bank kartasynyń derekterin engizýdiń qajeti joq. «BMTJ arqyly tóleý» batyrmasyn basasyz, sodan keıin óz bankińizdiń qosymshasyna ótip, tólemdi sol jerden rastaısyz, - dedi spıker.
Jyl sońyna deıin iske qosylatyn taǵy bir servıs – Request to Pay. Ol ártúrli bankterdiń klıentteri arasynda tólemge shot usynýǵa múmkindik beredi.
– Jyl sońyna deıin Request to Pay servısin engizýdi josparlap otyrmyz. Bul qyzmet arqyly bir banktegi kásipker basqa banktiń klıentine tikeleı tólem shotyn usyna alady. Mysaly, BCC bank klıentterine qyzmet kórsetetin kásipker Freedom Bank nemese kez kelgen basqa banktiń klıentine shot jibere alady, - dedi Bınur Jálenov.
Budan bólek, júıede telefon nómiri arqyly halyqaralyq aqsha aýdarymdaryn júzege asyrý múmkindigi de engiziledi.
– Qazirdiń ózinde Qytaı jáne Qyrǵyzstan baǵyttary boıynsha tehnıkalyq jumystar júrip jatyr. Úndistanmen, Birikken Arab Ámirlikterimen memorandýmdarǵa qol qoıyldy, Túrkııamen jumys júrgizilip jatyr. Aldaǵy ýaqytta bul baǵyttardyń qatary keńeıe beredi, – dedi bank tóraǵasynyń orynbasary.
Sondaı-aq statıkalyq QR-kodtar arqyly tólem jasaý servısi iske qosylady. Bul avtoturaqtarda, Halyqqa qyzmet kórsetý ortalyqtarynda nemese qoǵamdyq kólikte ornalastyrylǵan QR-kodtardy bank qosymshasymen skanerlep, birden tólem jasaýǵa múmkindik beredi.
Eske salaıyq, 17 shildede Qazaqstannyń iri bankteri taýarlar men qyzmetterge bankaralyq QR arqyly tólem jasaý servısin iske qosty.
Aıta keteıik, 19 shildeden bastap bul júıege qosylý elimizdegi barlyq ekinshi deńgeıli bank úshin mindetti bolmaq.
