Qazaqstandyqtar ınternet arqyly alǵan taýar quny 200 dollardan assa, operatorǵa deklaratsııa qunyn tóleıdi
ASTANA. KAZINFORM – Qazaqstandyqtar shetelden ınternet arqyly alǵyzǵan taýar quny 200 dollardan assa, jetkizetin operatorǵa deklaratsııa qunyn tóleıdi. Eýrazııalyq ekonomıkalyq odaqtyń Keden kodeksin jetildiretin hattamanyń mánin túsindirgen Premer-mınıstrdiń orynbasary – Ulttyq ekonomıka mınıstri Serik Jumanǵarın osyndaı málimet aıtty.
Májilis otyrysynan keıin BAQ ókilderi atalǵan shart ınternet arqyly taýar alǵyzý qıyndaýy múmkin degen kúdikterin aıtqan. Serik Jumanǵarın ondaı túsinik jańsaq ekenin aıtty.
- Menińshe, kerisinshe ınternet arqyly taýar alǵyzý jeńildeıdi. Amazon-nan taýar aldyńyz deıik. Múlde basqa taýar nemese sapasyz bolyp kelýi múmkin. Ne isteısiz? Taýardy qaıtarý óte qıyn bolady ǵoı, durys pa? Másele óte kóp boldy. Al endi bul operator taýardy sizge jetkizip qana qoımaı, kedende siz úshin deklaratsııa tapsyrady. Quny 200 dollardan, salmaǵy 31 kılogramnan aspasa, deklaratsııa úshin aqsha tólemeısiz. «Qazposhta» úıińizge jetkizip beredi, siz aqshasyn tóleısiz, - dedi ol.
Sondaı-aq, ol mundaı shartpen alǵyzǵan taýardy sapasy nashar bolsa, qaıtarý protsesi qalaı júretinin «Qazposhtanyń» mysalymen túsindirdi.
- Al sapasy unamasa, «Qazposhta» taýardy qaıtarýmen ózi aınalysady. ıAǵnı bul sizdiń problemańyz bolmaý kerek. Eger taýar durys deklaratsııadan ótpegen bolsa, oǵan da «Qazposhta» jaýapty bolady. Qalasańyz ol deklaratsııany ózińiz de toltyra alasyz, - dedi Serik Jumanǵarın.
Buǵan deıin atalmysh hattama shetelden ınternet arqyly aldyratyn taýarlardyń baǵasyn 2 paıyzǵa kóterýi múmkin ekenin jazǵan edik.