Qazaqstandyqtar halyqaralyq júrgizýshi kýáligin qaıdan jáne qalaı ala alady

ALMATY. KAZINFORM — Almaty qalalyq polıtsııa departamenti, azamattarǵa halyqaralyq júrgizýshi kýáligin berýge quqyǵy joq jeke uıymdarǵa, týrıstik agenttikterge jáne basqa da qurylymdarǵa júginýge bolmaıtynyn eskertedi. 

Halyqaralyq júrgizýshi kýáligi — júrgizýshiniń shetelde kólik quralyn basqarý quqyǵyn rastaıtyn qujat. 1968 jyly 8 qarasha kúni jol qozǵalysy týraly Vena konventsııasyna qol qoıǵan qujatty 180-nen astam el moıyndaǵan.

Almaty qalalyq Polıtsııa departamentiniń ákimshilik polıtsııa basqarmasynyń protsessıng ortalyǵynyń bastyǵy Aıdyn Merkimbaevtyń túsindirýinshe, Qazaqstan Respýblıkasynyń «Іshki ister organdary týraly» zańynyń 6-babyna sáıkes, júrgizýshi kýálikterin, onyń ishinde halyqaralyq kýálikterdi berý ishki ister organdarynyń aıryqsha quzyretine jatady.

— Qazir elde halyqaralyq júrgizýshi kýálikteri berilmeıdi. Azamattardyń kúmándi onlaın-saıttar nemese jeke fırmalar arqyly kýálik rásimdeýge bergen ótinishteri zańdy kúshke ıe emes. Halyqaralyq júrgizýshi kýáligi ulttyq júrgizýshi kýáliginiń ornyn baspaıdy, tek onyń resmı aýdarmasy ǵana, — dep atap ótti polıtsııadan.

Qujat qajet bolýy múmkin:

* shetelde avtokólikti jalǵa alý kezinde;

* jeke avtokólikpen shekaradan ótý kezinde;

* joldaǵy tekserý barysynda qujattardy kórsetý kezinde;

* shetelde saqtandyrý rásimdeý kezinde.

Halyqaralyq júrgizýshi kýáligin alý úshin emtıhan tapsyrý nemese oqýdan ótý talap etilmeıdi.

Almaty qalalyq polıtsııa departamenti, azamattardy saq bolýǵa jáne alaıaq deldaldardyń arbaýyna túspeýge shaqyrady.

Kúmán týyndaǵan jaǵdaıda azamattarǵa aýmaqtyq ishki ister organdaryna júginip, tolyq aqparat alýǵa keńes beriledi.

Buǵan deıin júrgizýshi kýáligin alatyndar 073/e anyqtamasyn qaǵaz túrinde tapsyrmaıtyny týraly jazǵanbyz.