Qazaqstandyqtar etti fermerlerden tikeleı onlaın satyp ala alady

ASTANA. KAZINFORM — Aýyl sharýashylyǵy mınıstrligi el turǵyndaryn fermerlerden deldalsyz tikeleı et satyp alý múmkindigin jasap otyr. Joba jyl sońynda qosylady. 

Áńgime 2023 jyly tanystyrylǵan aýyl sharýashylyǵy óndirýshilerine arnalǵan tsıfrlyq qural «Tört Tülik» mobıldi qosymshasynyń damýyna qatysty bolyp otyr.

Búgin Úkimet otyrysynan keıin ótken brıfıngide Aýyl sharýashylyǵy mınıstri Aıdarbek Saparov platforma jumysynda tehnıkalyq aqaý men máseleniń baryn aıtty.

— Jańa qosymshany úırenýge ýaqyt qajet ekenin bilemiz. Sondyqtan bul júıe jumys isteıtin bolady, birqatar ózgeris engizdik. Qazir júıe birshama qalypty jumys istep tur, — dedi mınıstr.

Mınıstrdiń orynbasary Amanǵalı Berdalınniń aıtýynsha, «Tört Tülik» qosymshasy únemi jetildirilip jatyr. Júıe fermerlerge maldy tirkeýden bastap, soıý aldyndaǵy veterınarlyq tekserýge jáne anyqtama alýǵa deıingi barlyq qyzmetti onlaın alý úshin jasalǵan.

— Qazir keıbir kemshilik bar, biz olarmen jumys istep jatyrmyz, júıeni únemi jetildiremiz. Bul júıe — veterınarııanyń bolashaǵy, jaqyn arada qalaǵanymyzdaı jumys isteıtin bolady, — dep tolyqtyrdy Amanǵalı Berdalın.

Taǵy bir Aýyl sharýashylyǵy vıtse-mınıstri Baǵlan Bekbaýovtyń aıtýynsha, «Tört Tülik» qosymshasy kezeń-kezeńimen engizilip jatyr. Alǵashynda qosymsha sharýa ıelerine qoljetimdi bolmaq. Al ekinshi kezeń, ıaǵnı jyl sońyna deıin platforma barlyq qazaqstandyq qoldana alady.

— Qazir mobıldi qosymsha jeke tulǵalar úshin shekteýli. Etti satyp alý ekinshi kezeńge josparlanǵan. Qazir sol baǵytta jumys istep jatyrmyz, jyl sońyna deıin ekinshi kezeńdi tolyqtaı júzege asyryp, iske qosýdy josparlap otyrmyz, — dedi Baǵlan Bekbaýov.

Aıta ketsek, elimizde veterınarııalyq qujaty joq mal ónimin satqandar qylmystyq jaýapkershilikke tartylýy múmkin.