Qazaqstandyqtar endi SIM kartany tek baılanys operatorlarynan ǵana satyp ala alady
ASTANA. KAZINFORM – «Baılanys qyzmetterin kórsetý qaǵıdalaryn bekitý týraly» Qazaqstan Respýblıkasy Investıtsııalar jáne damý mınıstriniń mindetin atqarýshynyń 2015 jylǵy 24 aqpandaǵy № 171 buıryǵyna ózgerister men tolyqtyrý engizildi.
«Ashyq NQA» portalynda jarııalanǵan joba sáıkestendirýsiz tirkelgen qazaqstandyq operatorlardyń SIM-kartalaryn paıdalana otyryp jasalatyn ınternet-alaıaqtyqtarmen kúresýge baǵyttalǵan.
- Abonenttik nómirlerdiń tirkelýin baqylaýdy kúsheıtý jáne jeke basyn sáıkestendirý nómirinsiz SIM-kartalardy satýǵa shekteýler engizý usynylady. Túzetýler kúshine engennen keıin SIM-kartalardy satyp alýdy baılanys operatorlary júzege asyrady. Bul alaıaqtyq áreketterdiń sanyn azaıtýǵa múmkindik beredi. Abonentterdiń qaýipsizdigin arttyrý jáne alaıaqtyqpen kúresý úshin baılanys operatorlary arnaıy baılanys ortalyǵyn qurady, onda paıdalanýshylar aldaý áreketteri týraly jedel habarlaı alady. Mundaı shara alaıaqtyq áreketterdi tez anyqtaýǵa, kúdikti nómirlerdi buǵattaýǵa, quqyq qorǵaý organdary úshin derekterdi jınaýǵa, sondaı-aq halyqtyń tsıfrlyq saýattylyǵyn jáne operatorlardyń qyzmetterine degen senim deńgeıin arttyrýǵa múmkindik beredi, - delingen qujatta.
Odan bólek, jobada jazylǵandaı, qazaqstandyq SIM-kartalardy, onyń ishinde sońǵy paıdalanýshyny sáıkestendirmeı dıstrıbıýtorlar men dılerlerge tirkelgen ınternet-alaıaqtyqtar sanynyń turaqty ósýine baılanysty zańnamaǵa ózgerister engizý qajettiligi týyndaıdy.
Alaıaqtar aýystyrýǵa bolatyn jáne halyqaralyq nómirlerdi belsendi qoldanady, bul tergeýdi qıyndatady jáne kinálilerdiń jazalanbaı qalý yqtımaldylyǵyn arttyrady. Usynylǵan ózgeris azamattardy qorǵaýǵa jáne uıaly baılanys arqyly jasalatyn qylmystardy tejeýge baǵyttalǵan.
Abonent uıaly baılanys jelilerindegi kúdikti qońyraýlar faktisi boıynsha uıaly baılanys operatorynyń aqparattyq-anyqtamalyq qyzmet kórsetý júıesine shaǵym túsiredi. Abonenttik nómirdi teksergennen keıin uıaly baılanys operatory qajet bolǵan jaǵdaıda qosymsha málimetter suratady. Abonenttiń shaǵymynda kórsetilgen faktiler rastalǵan kezde uıaly baılanys operatory abonenttik nómirdi buǵattaıdy.
Buıryq jobasy 2025 jylǵy 23 mamyrǵa deıin qoǵamdyq talqylaýǵa usynylyp otyr.
Aıta keteıik, búginde elimizde bir qolǵa beriletin SIM-karta sanyn shekteıtin zań ázirlenip jatyr.
Eske salsaq, bıyl naýryzda 38 myńnan astam tirkelmegen SIM-karta tárkilengeni týraly habarlaǵan edik.
Sondaı-aq eGov portalynda zańsyz tirkelgen SIM-kartany anyqtaıtyn qyzmet iske qosyldy.