Qazaqstandyqtar endi bóten ETsQ-ny paıdalansa, jaýapkershilikke tartylady

ASTANA. KAZINFORM — Endi jeke jáne zańdy tulǵalardyń derbes derekterdi qorǵaý jáne elektrondyq tsıfrlyq qoltańba salalaryndaǵy ákimshilik quqyq buzýshylyqtar úshin ákimshilik jaýapkershilikke tartý merzimi quqyq buzýshylyq jasalǵan kúnnen bastap eki aıdan bir jylǵa deıin uzartyldy. Bul týraly QR TsDIAÓM baspasóz qyzmeti málim etti.

эцқ
Фото: Kazinform

Jańa normalar 2025 jylǵy 13 naýryzdan bastap kúshine endi.

— Derbes derekter jáne olardy qorǵaý týraly zańnamany buzý, atap aıtqanda, derbes derekterdi zańsyz jınaý, óńdeý jáne olardy qorǵaý sharalaryn saqtamaý úshin QR ÁQBtK-niń 79-baby boıynsha ákimshilik aıyppuldardyń mólsheri úsh ese ulǵaıtylady. Buryn aıyppuldar quqyq buzýshylyqtyń quramyna jáne kásipkerlik sýbektisiniń sanatyna baılanysty 10-nan 1000 AEK-ke deıin ózgerip otyrǵan. Endi olar 30-dan 2000 AEK-ke deıin ulǵaıtylady, — delingen habarlamada.

Budan bólek, Qazaqstan Respýblıkasynyń elektrondyq qujat jáne elektrondyq tsıfrlyq qoltańba týraly zańnamasyn buzǵany úshin QR ÁQBtK-niń 640-baby boıynsha jańa ákimshilik quqyq buzýshylyq túri kúshine enedi. ıAǵnı, basqa adamnyń ETsQ kiltin paıdalanǵany úshin ákimshilik jaýapkershilik qarastyrylady.

— Buǵan deıin ákimshilik jaýapkershilik tek ETsQ kiltin úshinshi tulǵalarǵa zańsyz berý jáne ony qorǵaý boıynsha tirkeý kýáliginiń ıesi tarapynan qajetti sharalardy qabyldamaý jaǵdaılaryna ǵana qoldanylatyn. Endi ózgerister kúshine engennen keıin, ETsQ-ny zańsyz bergen de, ony paıdalanǵan tulǵalar jaýapkershilikke tartylady, — dep habarlady QR TsDIAÓM baspasóz qyzmetinen.

Qabyldanǵan sharalar azamattardyń jeke derekterin qorǵaýdy kúsheıtýge, elektrondy tsıfrlyq qoltańbany paıdalaný qaýipsizdigin qamtamasyz etýge jáne ETsQ-ǵa baılanysty alaıaqtyq áreketterdi azaıtýǵa, sondaı-aq aqparattandyrý salasyndaǵy buzýshylyqtar úshin jaýapkershilikti arttyrýǵa baǵyttalǵan.

Eske sala keteıik, buǵan deıin ETsQ-nyń jabyq kiltin ruqsatsyz paıdalanýǵa jaýapkershilik engiziletinin jazǵan bolatynbyz.

Сейчас читают