Qazaqstandyqtar emdelý úshin qaı elderge barady
Qazaqstannyń medıtsınalyq qyzmetter naryǵy jylyna 200 mln AQSh dollaryna deıin ekonomıkalyq paıdasyn joǵaltýda, sebebi jylyna 50 myń qazaqstandyq em alý úshin shet memleketterge barady.
Bul týraly «Astana damý ortalyǵy» JShS medıtsınalyq týrızmdi damytý jónindegi basqarýshy dırektory Darına Demıan aıtty, dep habarlaıdy Kazinform agenttigi.
«Medıtsınanyń jahandaný dáýirinde, halyqaralyq saıahattar men medıtsınalyq aqparattar ınternette ońaı qoljetimdi kezinde medıtsınalyq týrızm jahandyq densaýlyq saqtaý júıeleri úshin de, týrızmdi damytý turǵysynan da mańyzdy máselege aınaldy. Búginde bul – ózindik biregeıligi men erekesheligi bar medıtsınalyq qyzmetterdiń úlken naryǵyn qalyptastyrǵan tutas sala. Mundaı týrlardy jobalaýǵa dárigerler, týrıstik agenttikter, zańgerler jáne saqtandyrý kompanııalary syndy ártúrli mamandar jumyldyrylǵan», - dedi D. Demıan Astana qalasynyń kommýnıkatsııalar qyzmetinde.
Onyń aıtýynsha, 2000 jyldardyń basynan beri medıtsınalyq týrısterdiń negizgi aǵymy batys elderinen shyǵysqa qaraı jyljydy. Atap aıtqanda, Ońtústik Koreıa, Qytaı Halyq Respýblıkasy, Ońtústik-Shyǵys Azııanyń keıbir elderine jıi bara bastady.
«Ásirese, óz úkimetterinen memlekettik qoldaý alyp otyrǵan, medıtsınalyq týrızmdi damytýdyń uzaq merzimdi baǵdarlamalary Koreıa, Túrkııa, BAÁ erekshe belsendi. Túrli derekter boıynsha atalǵan elderge Qazaqstannan jyl saıyn shamamen 200 mln AQSh dollary aýdarylady (jylyna 50 myń adam), nátıjesinde jergilikti medıtsınalyq qyzmetter naryǵy áleýetti ekonomıkalyq paıdasyn joǵaltady», - deıdi spıker.
Sońǵy birneshe jylda medıtsınalyq týrızm naryǵynyń álemdik kólemi 10 mıllıardtan 140 mıllıard AQSh dollaryna deıin, al medıtsınalyq týrıster sany – jylyna 5 mıllıonnan 16 mıllıonǵa deıin jetken.
Halyqaralyq statıstıkaǵa sáıkes, medıtsınalyq týrısterdiń 85 paıyzy anaǵurlym sapaly medıtsınalyq qyzmet úshin barady. Árbir medıtsınalyq týrıst bir saparynda 5-14 myń dollarǵa deıin jumsaıdy.
Medıtsınalyq týrısterdiń 15 paıyzy óz elinde kezek kútpesten, shuǵyl kómek kómek alý úshin shetel asady. Al 25 paıyzy – medıtsınalyq qyzmet úshin qarajatyn únemdeýdi kózdeıdi.
