Qazaqstandyqtar eldegi munaı-gaz qorlary men óndirisin qadaǵalaı ala ma

Qazaqstandyqtardyń eldegi munaı-gaz qorlary men óndirisin naqty ýaqyt rejıminde qadaǵalaıtyn múmkindigi bola ma? Bul suraqqa QR Energetıka vıtse-mınıstri Baqytjan Іlııas jaýap berdi, dep habarlaıdy Kazinform tilshisi.

Vıtse-mınıstr eldegi munaı ken oryndary, janar-janarǵamaı beketteri, munaı óńdeý zaýyttary tsıfrlanatynyn, barlyq aqparattyq júıeler tórt pozıtsııa boıynsha qaralyp jatqanyn atap ótti. Mundaı júıeniń Energetıka mınıstrligine, basqa memlekettik organdarǵa, bıznes jáne azamattar úshin paıdasy eskeriledi.

«Árbir aqparattyq júıeniń óz benefıtsıarlary bolady. Mysaly, munaı-gazdy esepke alý júıesiniń benefıtsıary Energetıka mınıstrligi bolyp belgilengen. Memlekettik kirister komıteti – bıznes sýbektilerin kameralyq tekserý úshin bekitiledi jáne azamattar tartylady. Óıtkeni kameralyq tekserý arqyly bıýdjetke aqsha túsiminiń tıimdiligi jaqsarady, biraq kásipkerlik sýbektileriniń ózderi buǵan múddeli bolmaýy múmkin, degenmen olar zań júzinde mindetti», - dedi Baqytjan Іlııas.

Vıtse-mınıstrdiń aıtýynsha, qoǵamdyq baqylaý úshin, kópshilikke qol jetkizý úshin aqparatty qoljetimdi etý jumystary júrgizilýde.

«Áli de biraz adam bilmeýi múmkin, biraq bizde aqparattyq-taldaý ortalyǵy bar, onyń bazasy búgingi kúni attestattaý-taldaý ortalyǵy bolyp qaıta quryldy. Kún saıyn munaı men gaz óndirý kólemi jarııalanatyn telegramm-kanal bar. Taǵy bir nárse – bul aqparatty azamattarǵa jetkizý kerek», - dep tolyqtyrdy vıtse-mınıstr.