Qazaqstandyqtar eGov Mobile qosymshasy arqyly gazǵa qosylýǵa ótinish bere alady

ASTANA. KAZINFORM – Endi jeke turǵyn úılerdiń ıeleri tabıǵı gazǵa qosylýǵa arnalǵan tehnıkalyq sharttardy eGov Mobile qosymshasy arqyly onlaın túrde ala alady. 

Qyzmet «QazaqGaz Aimaq» AQ-nyń abonentteri úshin qoljetimdi jáne jeke tulǵalar úshin tegin usynylady.

Gazǵa qosylýǵa arnalǵan tehnıkalyq sharttar – bul obektini gaz taratý júıesine qosý múmkindigin rastaıtyn qujat.

Qyzmetti obektiniń ıesi paıdalana alady. Ol úshin paıdalanýshy qosymshada kórsetilgen barlyq mindetti ashyq oryndardy toltyryp, obektige tirkelgen quqyqtar týraly málimetterdi rastaý qajet.

Qyzmetti alý úshin paıdalanýshy:

- eGov Mobile qosymshasynda avtorızatsııadan ótýi qajet jáne «Qyzmetter» bólimine ótip, «Jyljymaıtyn múlik jáne TKSh» - «Gaz taratý jelilerine qosylýǵa tehnıkalyq sharttar berý» batyrmasyn basý kerek;

- Obektiniń túrin kórsetý jáne ony qosý úshin tańdaý qajet;

- Obektiniń tehnıkalyq pasportyn tirkeý kerek;

- Tehnıkalyq sharttyń túrin, gazben jabdyqtaý júıelerine qosylý sebebin jáne gazdyń talap etiletin shyǵynyn kórsetýi qajet;

- Gaz jabdyǵynyń túrin tańdap, qosý, sanyn kórsetip jáne «Jalǵastyrý» batyrmasyn basý kerek;

- Ótinimge Face ID/Touch ID arqyly qol qoıý kerek.

Ótinim durys toltyrylǵan jaǵdaıda, qyzmet kórsetý nátıjesinde tehnıkalyq sharttar beriledi, olardy gaz taratý uıymy – «QazaqGaz Aimaq» AQ usynady, nemese negizdelgen bas tartý sheshimi shyǵarylady.

Tabıǵı monopolııalar salasyndaǵy qoldanystaǵy zańnamaǵa sáıkes tehnıkalyq sharttardy berýden bas tartýǵa kelesi jaǵdaılarda jol beriledi:

· Retteletin qyzmettiń talap etiletin kólemin usyný úshin qajetti bos jáne qoljetimdi qýattar, syıymdylyqtar, «QazaqGaz Aimaq» AQ jelileriniń oryndary, ótkizý qabiletteri bolmaǵan jaǵdaıda.

· «QazaqGaz Aimaq» AQ jelileri nemese rettelip kórsetiletin qyzmetti usyný úshin qajetti ózge de múlik bolmaǵan jaǵdaıda.

Qyzmet kórsetý merzimi obektiniń kúrdeliligine baılanysty: tehnıkalyq jaǵynan kúrdeli emes obektiler úshin 5 jumys kúni, kúrdeli obektiler úshin 10 jumys kúni.

Jańa fýnktsıonal QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ, Energetıka mınıstrligimen jáne «QazaqGaz Aimaq» AQ birlesip iske asyryldy.