Qazaqstandyqtar dárigerge Face ID arqyly qaralady

ASTANA. KAZINFORM — Endi qazaqstandyqtar dárigerdiń qabyldaýyna tsıfrlyq sáıkestendirý arqyly kiredi. Densaýlyq saqtaý mınıstrligi mamandarynyń málimdeýinshe, osynyń nátıjesinde medıtsına mekemeleri MÁMS esebine ótirik málimet bere almaıdy.

— Bizge MÁMS esebinen emdeletin azamattardan kóp shaǵym tústi. Olar medıtsına uıymdarynan ózderi almaǵan qyzmet týraly habarlama kelgenin aıtady. 2023 jyly 818 mln teńgege 46 myń jalǵan qyzmet kórsetý faktisi tirkelgen. Bul tek belsendi azamattardyń shaǵymyna negizdelgen statıstıka ekenin eskersek, jalǵan qyzmetterdiń sany budan áldeqaıda kóp bolýy múmkin, — deıdi Elektrondyq densaýlyq saqtaýdy damytý departamenti basshysynyń orynbasary Aıdar Qasenov.

Al byltyr aq halattylar 43 328 ret naýqastarǵa qyzmet kórsettik dep jalǵan aqparat bergen. Bul jaǵdaı depýtattardyń da qatań synyna ushyrady.  Dál osyndaı oqıǵalardyń aldyn alý úshin Densaýlyq saqtaý mınıstrligi tsıfrlyq sáıkestendirýdiń eki túrli mehanızmin usynyp otyr.

— Tsıfrlyq sáıkestendirý eki túrli ádispen júrgiziledi. Birinshisi «Tsıfrlyq qujat» elektrondyq úkimettiń» servısinen usynylatyn 6 sandyq kod boıynsha jáne Face ID tehnologııasyn paıdalana otyryp patsıentti sáıkestendirý. Bul mehanızmder iske qosylsa, qujattaryńyzdy ózińizben alyp júrýdiń qajeti bolmaıdy. Sondaı-aq, jeke basyńyzdy kýálandyratyn qujat arqyly sáıkestendirýden ótýge quqyǵyńyz bar. Júıeniń tekserisi 100 paıyz senimdi dep aıta alamyz, — deıdi Densaýlyq saqtaý mınıstrligi.

Dárigerge qaralý úshin «Tsıfrlyq qujat» servısiniń qyzmetin paıdalaný qajet:

1-qadam: Egov mobile, nemese ózge de tsıfrlyq qujatyńyz saqtalǵan qosymshany ashasyz.

2-qadam: «Tsıfrlyq qujattar» bólimin tańdap, «Ruqsat berýdi ashý» batyrmasyn basasyz.

3-qadam. Dárigerge 6 tańbaly kodty aıtasyz.

4-qadam. Dáriger kodty júıege engizip, qabyldaýǵa kelgenińizdi rastaıdy.

Al smartfonyńyz bolmasa, ózińizdiń jeke basyńyzdy Face ID tehnologııasy arqyly kýálandyra alasyz:

1-qadam: dáriger veb-kamera arqyly betińizdi sýretke túsiredi;

2-qadam: júıe fotosýretti derekqormen salystyrady;

3-qadam: derekter sáıkes kelse, dárigerdiń qabyldaýynda bolǵanyńyz rastalady.

— Tsıfrlyq sáıkestendirý byltyr qazan aıynan bastap pılottyq joba retinde qoldanylyp jatyr. Mehanızm alǵash ret respýblıkalyq medıtsınalyq-sanıtarııalyq alǵashqy kómek ortalyǵyna engizildi. Jyl sońyna deıin Astanadaǵy medıtsına mekemeleri túgeldeı dál osy júıemen jumys isteýdi bastady. Bıyl Qazaqstandaǵy barlyq emhanaǵa tsıfrlyq sáıkestendirý qyzmetin engizýdi josparlap otyrmyz. Densaýlyq saqtaý salasyn bul baǵytta tsıfrlandyrý úshin bıýdjetten eshqandaı aqsha bólinbeıdi. Face ID tehnologııasyna qajetti veb-kameralardy árbir medıtsınalyq uıym óz qarjysyna satyp alady, — deıdi Aıdar Qasenov.

Aıta keteıik, ótken joly MÁMS-pen qamtylmaǵandar aqysyz onkologııalyq skrınıngten óte alatynyn habarlaǵan edik.