Qazaqstandyqtar bilimge óte qushtar - amerıkalyq ǵalym

ALMATY. KAZINFORM – Almatyda ótken IQ BBQ ǵylymı-mýzykalyq festıvaline amerıkalyq astrofızık, Arızona shtatynda jer men ǵaryshty zertteý ýnıversıtetiniń professory Loýrens Kraýss qatysty. Ol ǵarysh jáne ǵylym týraly baıandama jasady.

Іs-shara barysynda amerıkalyq astrofızık Qazaqstan týraly oıyn bildirdi.

- Bul meniń Qazaqstanǵa úshinshi ret, Almatyǵa ekinshi ret kelýim. Almatynyń taýlary men adamdary maǵan óte unady. Jergilikti ýnıversıtetterde birneshe ret lektsııa oqydym. Mundaǵy adamdardyń oqyp-bilýge degen qulshynysy kúshti, sondyqtan bolashaqta taǵy da kelemin dep oılaımyn, - dedi ol.

Sondaı-aq ǵalym kórermendermen suraq-jaýap kezinde «búgingi ǵarysh jarysynda kim jeńiske jetedi» degen saýalǵa jaýap berdi.

- Bolashaq óz oıyn shektemeı, tájirıbe jasaýǵa daıyn adamdarǵa tıesili jáne olardyń qaı jaqtan ekeni mańyzdy emes, - dedi amerıkalyq ǵalym.

Loýrens Kraýs ǵarysh týraly ǵylymı-fantastıkalyq kınofılmderdiń qaısysy shyndyqqa jaqyn ekenin atap ótti.

- Ǵaryshtaǵy saıahattyń shynaıy beınesin kórsetken fılmder óte az. Mysaly meniń dosym jasaǵan «Interstellar» fılmin alyp qarasaq, bul ǵylymı-fantastıkalyq fılmderdiń ishindegi eń shyndyqqa janaspaıtyny deýge bolady. Onyń qasynda «2001: A Space Odyssey» týyndysy jaman emes. Biraq onyń ózi ǵylymı-fantastıkalyq fılmder bolashaqty dál boljaı almaıtynyn kórsetedi. Sebebi 1968 jyly túsirilgen bul kınoda 2001 jylǵa qaraı bárimiz ǵaryshtaǵy qonaq úılerde turamyz dep boljaǵan. Biraq qazir eshkim ǵaryshta turyp jatqan joq. Sebebi adam úshin ǵaryshqa ushý fılmderde kórsetilgennen álde qaıda qıyn, - dedi astrofızık.

Sonymen qatar, amerıkalyq ǵalym ǵaryshtaǵy alys saparlarǵa tek robottardy jiberý múmkin ekenin aıtty.

- Menińshe, ǵarysh ishinde saıahattaýdyń shynaıy múmkindigi adamdarǵa qoljetimsiz. Sebebi biz ǵarysh úsh jaratylmaǵanbyz. Men ǵarysh ishindegi saıahatqa kishkentaı robottardy jibergendi qup kóremin. Mysaly, Marsta júretin qurylǵylar maǵan ol jaqta adam júrgennen kóbirek unaıdy. Biraq bul pikirmen meniń dosym Ilon Mask kelispeıdi. Ǵaryshqa saıahat bul óte qaýipti ári qymbat, - dedi Loýrens Kraýss.

Eske salaıyq, buǵan deıin kelesi qazaq ǵaryshkeri týraly Aıdyn Aıymbetovtyń pikirin jazǵanbyz.