Qazaqstandyqtar bıyl neni kóbirek satyp alǵany belgili boldy
ASTANA. KAZINFORM — 2026 jylǵy qańtar-qyrkúıekte Qazaqstandaǵy bólshek saýda kólemi 20 048,8 mlrd teńgeni qurap, 2025 jyldyń sáıkes kezeńimen salystyrǵanda 4,5%-ǵa ósti.
Ulttyq statıstıka bıýrosynyń baspasóz qyzmetiniń málimetinshe, ósim saýda kásiporyndarynda da, jeke kásipkerlik segmentinde de baıqaldy. Saýda kásiporyndarynyń taýar ótkizý kólemi 2,1%-ǵa, al bazarlarda saýda jasaıtyndardy qosa alǵanda, jeke kásipkerlerdiń taýar ótkizý kólemi 9,3%-ǵa artty.
— Bólshek saýdanyń taýarlyq qurylymynda azyq-túlik taýarlaryn ótkizý qarqyny joǵary boldy. Azyq-túlik taýarlaryn ótkizý kólemi 10,1%-ǵa, azyq-túlikke jatpaıtyn taýarlardy ótkizý kólemi 1,6%-ǵa ósti, — degen derek keltirdi vedomstvo.
Óńirler bólinisinde bólshek saýdanyń óńirlik qurylymynda eń joǵary úles:
- Almaty qalasyna tıesili, jalpy saýda kólemindegi úlesi 32,8%
- Odan keıin Astana qalasy (14,2%),
- Qaraǵandy oblysy (7%)
- Shyǵys Qazaqstan oblysy (5,3%) ornalasqan.
2026 jylǵy qańtar-qyrkúıekte kóterme saýda kólemi 40 707,2 mlrd teńgeni qurap, 2025 jyldyń sáıkes kezeńimen salystyrǵanda 7%-ǵa ósti. Kóterme saýda taýar aınalymynyń qurylymynda azyq-túlikke jatpaıtyn taýarlar men óndiristik-tehnıkalyq maqsattaǵy ónimder basym. Olardyń úlesi 80% shamasynda boldy.
Kóterme saýdanyń jalpy kóleminde eń joǵary úles Almaty qalasyna tıesili (35,1%). Odan keıin Astana qalasy (14,5%), Atyraý oblysy (13,5%) jáne Shymkent qalasy (6,3%) ornalasqan.
Buǵan deıin Jambyl oblysyndaǵy bólshek saýdanyń 70%-ǵa jýyǵy Tarazǵa tıesili ekenin jazǵanbyz.
