«Balalar dostyq kýbogy»: Beıjińde shahmattan balalar týrnıri ótti
ASTANA. KAZINFORM — 30 mamyr kúni Beıjińdegi Qazaqstannyń mádenı ortalyǵynda Balalardy qorǵaý kúnine oraı uıymdastyrylǵan alǵashqy «Balalar dostyq kýbogy» shahmat týrnıri ótti, dep habarlaıdy Kazinform agenttiginiń Beıjińdegi menshikti tilshisi.
Beıjińde ótken balalar shahmat týrnırine 6 elden 40-qa jýyq jas sportshy qatysty. Olardyń qatarynda Qytaıdyń shahmatshylary, sondaı-aq Ázerbaıjan, Qazaqstan, Reseı, AQSh jáne Ózbekstan elshilikteri qyzmetkerleriniń balalary boldy.
Uıymdastyrý komıtetiniń ókilderi jastar men gýmanıtarlyq almasýlardyń memleketter arasyndaǵy dostyq qarym-qatynasty damytýdaǵy erekshe rólin atap ótip, shahmatty halyqaralyq qarym-qatynastyń ámbebap tili dep atady.
Týrnır shveıtsarııalyq júıe boıynsha bes týrdan turdy. Ár oıynshyǵa partııaǵa 15 mınýt ýaqyt berilip, ár júris úshin qosymsha 10 sekýnd qosyldy. Jarys bastalar aldynda tóreshiler alqasy qatysýshylarǵa nusqaýlyq ótkizip, jarys erejeleri men shahmat etıkasynyń qaǵıdalaryn eske saldy.
«Úzdik shahmatshy qyz» arnaıy nomınatsııasynda qazaqstandyq Sofııa Raıymhanova jeńimpaz atandy. Danııal Sabıtov úzdik úshtikti túıindese, Lıý Sychen ekinshi orynǵa ıe boldy. Al Igor Shmelev týrnır jeńimpazy atandy. Barlyq qatysýshylarǵa estelik dıplomdar men baǵaly syılyqtar tabystaldy.
Іs-sharany Qytaıdaǵy Qazaqstannyń mádenı ortalyǵy, Zhiyi Fangzhou Sports & Culture Co., Ltd. kompanııasy jáne Beıjińdegi Yijia halyqaralyq shahmat klýby Qazaqstannyń Qytaıdaǵy elshiliginiń qoldaýymen uıymdastyrdy.
Aıta keteıik, elordalyq jasóspirim shahmattan Qazaqstan chempıony atandy.
