Qazaqstandyqtar bes aıda 800 mln teńgeden astam qarjysyn qaıtaryp aldy
ASTANA. KAZINFORM — Azamattar tipti 700 teńge turatyn sapasyz oıynshyqqa qatysty da ótemaqy talap etip, óz quqyqtaryn qorǵady. Bul týraly Saýda jáne ıntegratsııa mınıstrliginiń baspasóz qyzmeti habarlady.
2025 jyldyń qańtar-mamyr aralyǵynda Saýda jáne ıntegratsııa mınıstrligi Tutynýshylardyń quqyqtaryn qorǵaý komıteti men onyń aýmaqtyq departamentteri azamattarǵa taýarlar, qyzmetter men jyljymaıtyn múlik satyp alý barysynda jol berilgen buşýshylyqtar boıynsha quqyqtyq kómek kórsetip, aýqymdy jumys júrgizdi.
— Osy aralyqta tutynýshylardyń shaǵymdary boıynsha jalpy somasy 881,3 mıllıon teńgeden astam qarajat qaıtaryldy. Shaǵymdar kóbinese sapasyz taýarlar (avtokólikter, kosmetıka, uıaly telefondar), oryndalmaǵan qyzmetter (shıpajaı joldamalary, qoǵamdyq tamaqtaný, fıtnes, týrızm), sondaı-aq rásimdelmegen nemese ýaqtyly berilmegen jyljymaıtyn múlikke qatysty boldy, — delingen Saýda jáne ıntegratsııa mınıstrligi habarlamasynda.
Tutynýshy quqyǵy buzylǵan derekterge toqtalsaq:
Almaty qalasynda tutynýshy 215 mln teńgege satyp alǵan, biraq úshinshi tulǵaǵa satylyp ketken jyljymaıtyn múlik obektisine qatysty daý departamenttiń aralasýynan keıin oń sheshimin tapty.
Al Qaraǵandy oblysynda 45 kúnnen asa ýaqyt berilmegen páter boıynsha shart talaptarynyń oryndalýy qamtamasyz etilip, tutynýshy 33,5 mln teńge turatyn jyljymaıtyn múlikke qol jetkizdi.
Semeı qalasynda qoǵamdyq tamaqtaný ornynda tutynýshynyń tapsyrysy oryndalmaı, mekeme tutynýshylar buryshyn ornalastyrý mindetin oryndamaǵany úshin ákimshilik jaýapkershilikke tartyldy.
Aqtóbe oblysynda tutynýshynyń týroperatorlarǵa qatysty shaǵymy boıynsha sotqa deıingi jáne sot protsesinde departament mamandary qoldaý kórsetip, nátıjesinde 6,6 mln teńge ótemaqy óndirilip berildi.
Pavlodar men Jetisý oblystarynda ondaǵan tutynýshynyń quqyqtary toptyq negizde qorǵaldy: kosmetıka jıyntyǵy úshin rásimdelgen 10,8 mln teńge nesıe men jetkizilmegen smartfondar úshin 7,2 mln teńge qaıtaryldy.
Túrkistan oblysynda Dýbaı qalasyna oryndalmaǵan týr úshin 1,2 mln teńge qaıtarylyp, Shymkentte sanıtarlyq talaptarǵa sáıkes kelmeıtin jerde kórsetilgen fıtnes qyzmetteri úshin tutynýshylarǵa ótemaqy berildi.
Aıta ketelik úsh jylda 1 trıllıon teńgeden astam qarjy qaıtaryldy.