Qazaqstandyqtar aýrýhanadaǵy týysynyń jaǵdaıyn onlaın baqylaı alady – pılottyq joba iske qosylady
ASTANA. KAZINFORM – Qazaqstanda naýqastyń týysqandary men dárigerdiń qarym-qatynasyn retteıtin biryńǵaı standart engiziledi. Bul týraly Premer-mınıstr Oljas Bektenov Senat depýtatynyń saýalyna joldaǵan jaýapta aıtqan.
Densaýlyq saqtaý mınıstrligi medıtsınalyq aqparattyq júıelerdi ázirleýshilermen jáne múddeli memlekettik organdarmen birlesip, patsıentterdiń týystaryn aqparattandyrýǵa arnalǵan ortalyqtandyrylǵan servısti engizý baǵytynda pılottyq jobany iske asyrý máselesin pysyqtap jatyr. Ol mynalardy kózdeıdi:
— patsıenttiń aýrýhanaǵa jatqyzylý mártebesi týraly (bólimshede bolýy, reanımatsııada jatýy, operatsııada bolýy, basqa bólimshege aýystyrylýy jáne t. b.) týystaryn aqparattandyrýdyń biryńǵaı arnasyn qurý;
— memlekettik aqparattyq júıeler men tsıfrlyq sáıkestendirý quraldaryn paıdalana otyryp, ótinish berýshini sáıkestendirý jáne onyń ókilettigin rastaý tetikterin qamtamasyz etý;
— ótinishterdi tirkeı otyryp jáne aqparatqa qol jetkizýdi shekteýdi aıqyndaı otyryp, servısti medıtsınalyq aqparattyq júıelermen ıntegratsııalaý;
— medıtsınalyq uıymdardyń patsıentterdiń týystarymen kommýnıkatsııasynyń biryńǵaı reglamentteri men standarttaryn ázirleý.
Qarapaıymdap aıtsaq, memleket naýqastardyń týystaryn aqparattandyrýdy tolyqtaı tsıfrlandyrmaqshy. Ondaǵy maqsat – týysqany aýrýhanaǵa túsken adamnyń aqparat alý múmkindigin jeńildetip, dárigerlerdi basy artyq qońyraýlardan bosatý, halyq pen aýrýhanalar arasyndaǵy daý-janjaldy azaıtý. Sol úshin bir ortaq servıs jasalady. Týystar naýqastyń jaǵdaıyn, qaı bólimde jatqanyn, otaǵa nemese jan saqtaý bólimine alynǵanyn, qashan jalpy palataǵa aýystyrylǵanyn, qandaı em taǵaıyndalǵanyn sol servıs arqyly kóre alady. Biraq ol málimetti naýqasqa janashyr kez kelgen adam kóre almaıdy. Júıe málimet surap otyrǵan adamnyń rasymen týys ekenin ıntegratsııalanǵan portaldaǵy derekter bazasy arqyly tekseredi.
Pılottyq Joba áýeli Astana men Almatyda synaqtan ótedi. Sátti bolyp jasat, servıs eldegi barlyq aýrýhanalardyń aqparattyq júıelerimen biriktiriledi.
Eske salsaq, naýryzdyń basynda dárigerlerge kúsh qoldanǵandardy 12 jylǵa deıin bas bostandyǵynan aıyratyn zań kúshine engen bolatyn.
