Qazaqstandyqtar arasynda aýyr jaraqat alǵandar joq — SІM Reseıdegi oqıǵaǵa qatysty
ASTANA. KAZINFORM — QR SІM resmı ókili Erlan Jetibaev Reseıdiń Lenıngrad oblysynda bolǵan janjalǵa qatysty túsinikteme berip, Sankt-Peterbýrgtegi Bas konsýl Qazaqstan azamattaryna qoldaý kórsetip jatqanyn aıtty.
Onyń sózinshe, 2026 jylǵy 26 naýryzda Lenıngrad oblysynyń Ýst-Lýga vahtalyq aýylynda turmystyq sıpattaǵy oqıǵa bolyp, oǵan Qazaqstan azamattary da qatysqan.
— Jaǵdaıdy jan-jaqty jáne obektıvti anyqtaý maqsatynda Reseı Federatsııasynyń quqyq qorǵaý organdary tıisti protsessýaldyq sharalar júrgizip, qaqtyǵysqa qatysýshylar ustaldy. Qazirgi ýaqytta tergeý áreketteri jalǵasyp jatyr. Qoldaǵy málimetterge sáıkes, Qazaqstan azamattary arasynda aýyr jaraqat alǵan nemese aýrýhanaǵa jatýdy qajet etetin tulǵalar joq. Oqıǵa ornyndaǵy jaǵdaı turaqty jáne tıisti qyzmetterdiń baqylaýynda, — dedi Jetibaev.
QR SІM resmı ókili atap ótkendeı, Qazaqstan Respýblıkasynyń Sankt-Peterbýrgtegi Bas konsýldyǵy qyzmetkerleri Reseı Federatsııasynyń quqyq qorǵaý organdary ókilderimen turaqty baılanysta.
— Bas konsýl oqıǵa ornyna baryp, Qazaqstan azamattaryna qajetti konsýldyq-quqyqtyq qoldaý kórsetip, barlyq jaǵdaıdy naqtylap otyr, — dedi ol.
Eske salsaq, keshe áleýmettik jelilerde Reseıdegi qurylys nysandarynyń birinde bolǵan jappaı tóbelestiń vıdeosy qyzý talqyǵa tústi. Bulardyń arasynda Qazaqstan azamattary bolýy múmkin ekeni aıtyldy. Óz kezeginde QR Syrtqy ister mınıstrligi shuǵyl tekserý jumystaryn bastaǵanyn málimdedi.
