Qazaqstandyqtar AQSh vızasyn alatyn kezde nege qıyndyqqa tap bolady
ASTANA. KAZINFORM – Qazaqstan Respýblıkasynyń Syrtqy ister mınıstrligi qazaqstandyqtardyń AQSh vızasyn alý kezinde jıi bas tartýǵa tap bolýynyń sebebine túsinikteme berdi.
Atap aıtqanda, vedomstvonyń resmı ókili Erlan Jetibaev buǵan deıin Syrtqy ister mınıstriniń birinshi orynbasary Erjan Ashyqbaev aıtqan AQSh vızasyna ótinish bergen qazaqstandyqtardyń shamamen 45-46 paıyzyna bas tartylatyny týraly málimetke túsinik berdi.
Onyń aıtýynsha, vıza berý týraly túpkilikti sheshimdi shetel memleketiniń ýákiletti organdary qabyldaıdy. Eger ótinish berýshi qujattardyń tolyq toptamasyn usynyp, eshqandaı zańbuzýshylyqqa jol bermese, vızany alý múmkindigi joǵary bolady.
– Eger qujattarda qandaı da bir sáıkessizdik bolsa, ádette azamatqa naqtylaý suraqtary qoıylyp, qosymsha qujattar talap etiledi. Meniń bilýimshe, olar ýaqytyly usynylǵanda, kóp jaǵdaıda vıza maquldanady, – dedi Erlan Jetibaev SІM-de ótken brıfıngte.
Resmı ókildiń sózinshe, vızadan bas tartýǵa kóbine qujattardy rásimdeý kezindegi tehnıkalyq qatelikter sebep bolady.
– Bul negizinen qujattardyń talaptarǵa sáıkestigine qatysty tehnıkalyq máseleler. Keıbir elderde talap etiletin qujattar tizimi kólemdi bolsa, endi birinde azdaý. Alaıda qujattar sany az bolǵannyń ózinde olardy durys rásimdemeý jaǵdaılary kezdesedi. Máselen, saýalnamany toltyrý kezinde, saqtandyrý polısin resimdeýde nemese jol júrý bıletterin usynýda qatelik jiberiledi. Árbir jaǵdaı jeke qaralady, – dep túsindirdi vedomstvo ókili.
Sondaı-aq Erlan Jetibaev Qazaqstandaǵy AQSh konsýldyqtaryna júginetin Reseı azamattarynyń vızany jıirek alatyny týraly aqparatqa da pikir bildirdi.
– Suraqtyń ekinshi bóligine kelsek, Reseı azamattaryna qatysty mundaı aqparat bizde joq. AQSh elshiligi tarapynan da osyǵan qatysty qandaı da bir resmı málimdeme nemese statıstıkalyq derekter jarııalanǵan joq, – dedi ol.
Buǵan deıin QR Syrtqy ister mınıstrligi Eýropalyq odaq elderine vızalyq ótinishterdi qaraý merziminiń uzarýyna qatysty túsinikteme berip, vızalyq rejımdi jeńildetý jónindegi kelissózderdiń barysy týraly aıtqan edi.
