Qazaqstandyqtar 8 myń tonnaǵa jýyq altyn satyp alǵan

ASTANA. KAZINFORM – Ulttyq bank 2024 jyldyń qorytyndysy boıynsha ekinshi deńgeıli bankterge jáne banktik emes jekelegen aıyrbastaý pýnkterine jalpy salmaǵy 1,7 tonna 47 395 ólshemeli quıma satqan. Bul týraly Ulttyq banktiń baspasóz qyzmeti habarlady. 

2024 jyly quımalar kóp satylǵan óńirler: Almaty (32 735 dana, 69%), Shymkent (5 200 dana, 11%) jáne Qaraǵandy (2 209 dana, 5%).

Halyqqa arnalǵan ólshemeli quımalardy satyp alý jáne satý Halyk Bank, Eýrazııalyq bank, Jusan Bank, TsentrKredıt Banki arqyly, sondaı-aq banktik emes jekelegen aıyrbastaý pýnkterinde qoljetimdi.

- 2024 jyly ekinshi deńgeıli bankter men banktik emes jekelegen aıyrbastaý pýnkteri keri satyp alýdy eskergende, halyqqa jalpy salmaǵy 2,5 tonna 71 106 quıma satty. Baǵdarlama iske qosylǵaly jalpy salmaǵy 7,9 tonna bolatyn 222 680 altyn quıma satyldy. Halyq arasynda suranysqa ıe quıma salmaǵy – 10 g. Jalpy satylǵan kólem ishinde onyń úlesi 25% – 54 875 dana. Odan keıin 5 gramdyq quıma – 49 145 dana (22%), 100 gramdyq quıma – 47 943 dana (22%), 20 gramdyǵy – 40 843 dana (18%) jáne 50 gramdyq quıma – 29 874 dana (13%), - delingen habarlamada.

Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.

- Árbir quıma qorǵaý elementterimen qaptalǵan (quımanyń aına beti, mıkrotekst jáne bederli jıegi bar) jáne mehanıkalyq zaqymdanýdan qorǵaıtyn arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵanysh qoraby sapa sertıfıkaty bolyp ta sanalady. Sondyqtan, altyn quımany uqypty saqtap, qorabyn búldirmeýge keńes beremiz, - delingen Ulttyq bank habarlamasynda.