Qazaqstandyqtar 310 mlrd teńge somada járdemaqy men áleýmettik tólem aldy
ASTANA. KAZINFORM — Jyl basynan beri múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardy (budan ári – MÁJ) tóleýge respýblıkalyq bıýdjetten 272,7 mlrd teńge jumsaldy. Bul týraly Eńbek jáne halyqty áleýmettik qorǵaý mınıstrligi málimdedi.
Buǵan qosymsha Memlekettik áleýmettik saqtandyrý qorynan (budan ári — MÁSQ) eńbekke qabilettiliginen aıyrylý jáne asyraýshysynan aıyrylý boıynsha shamamen 37,3 mlrd teńge somasyna áleýmettik tólemder júzege asyryldy.
Mınıstrliktiń dereginshe, 2025 jylǵy 1 maýsymdaǵy jaǵdaı boıynsha múgedektigi boıynsha MÁJ alýshylar sany shamamen 542,5 myń adamdy, asyraýshysynan aıyrylý jaǵdaıy boıynsha — shamamen 198,1 myń adam bolǵan.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady.
— Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty bolady, — delingen habarlamada.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-dan áleýmettik tólemder júzege asyrylady. Máselen, 2025 jylǵy 1 maýsymdaǵy jaǵdaı boıynsha 93,2 myń adam eńbek etý qabiletinen aıyrylý boıynsha áleýmettik tólem, al 64,2 myńǵa jýyq otbasy asyraýshysynan aıyrylý boıynsha áleýmettik tólem aldy.
Tólemderdiń mólsheri jeke jáne mynalarǵa baılanysty: sońǵy 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady.
— Múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri 2025 jylǵy 1 qańtardan bastap eń tómen kúnkóris deńgeıiniń ulǵaıýyna baılanysty 6,5% — ǵa ósti. QR Úkimetiniń sheshimi boıynsha eńbekke qabilettiliginen aıyrylý jáne asyraýshysynan aıyrylý boıynsha MÁSQ-dan tólenetin tólemderdiń mólsheri de 6,5% — ǵa artty, — dep jazdy vedomstvodan.
Máselen, osy jyly jalpy aýrýdan múgedektigi boıynsha MÁJ mólsheri 1-top úshin — 101 702 teńgeni, 2-top úshin — 81 362 teńgeni, 3-top úshin — 55 474 teńgeni quraıdy.
1 maýsymdaǵy jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 70 245 teńge, asyraýshysynan aıyrylý boıynsha — 72 524 teńge bolyp otyr.
Buǵan deıin habarlanǵandaı, ıeliginde birneshe kólik pen jyljymaıtyn múlki bar otbasylardy áleýmettik qoldaý toqtatylýy múmkin.