Qazaqstandyqtar 220 myńnan astam taýardyń baǵasyn bir platformadan salystyra alady
ASTANA. KAZINFORM – Qazaqstanda tutynýshylarǵa ártúrli dúkenderdegi taýar baǵalaryn salystyryp, tıimdi usynystardy tańdaýǵa múmkindik beretin arzan.kz tsıfrlyq servısi damytylmaq. Osy maqsatta Saýda jáne ıntegratsııa mınıstrligi men platforma ókilderi yntymaqtastyq týraly memorandýmǵa qol qoıdy, dep habarlady Saýda jáne ıntegratsııa mınıstrligi.
Birlesken jumys halyqqa taýar baǵalary men jeńildikter týraly aqparattyń qoljetimdiligin arttyrýǵa, tıimdi saýda jasaý mádenıetin qalyptastyrýǵa jáne baǵa monıtorınginiń tsıfrlyq quraldaryn jetildirýge baǵyttalǵan.
Qazirgi ýaqytta arzan.kz platformasy Qazaqstannyń 7 qalasynda jumys isteıdi. Servıs arqyly 18-den astam saýda sýbektisi usynǵan 220 myńnan astam taýardyń baǵasyn salystyrýǵa bolady.
Platforma tutynýshylarǵa qajetti taýarlardan óz sebetin qurastyrýǵa, olardyń ártúrli dúkenderdegi baǵalaryn salystyrýǵa, qoldanystaǵy jeńildiktermen tanysýǵa jáne eń tıimdi usynysty tańdaýǵa múmkindik beredi.
Osylaısha, azamattar satyp alýdy aldyn ala josparlap, otbasylyq bıýdjetin únemdeı alady.
– Yntymaqtastyq aıasynda áleýmettik mańyzy bar azyq-túlik taýarlaryna erekshe nazar aýdarylady. Platformada olar arnaıy belgimen kórsetilgen. Nátıjesinde tutynýshylar áleýmettik mańyzy bar azyq-túlik taýarlaryn basqa ónimderden ońaı ajyrata alady, – delingen mınıstrlik aqparatynda.
Sonymen qatar servıste tutynýshylardyń quqyqtaryn qorǵaý, saýda júrgizý qaǵıdalary jáne saýda ústemelerin qoldaný tártibine qatysty qoldanystaǵy zańnama normalaryna siltemeler ornalastyrylady.
Bul azamattarǵa óz quqyqtaryn jaqsyraq bilýge jáne qandaı taýarlarǵa saýda ústemesin memlekettik retteý qoldanylatynyn túsinýge kómektesedi.
Mınıstrlik málimetinshe, yntymaqtastyq erikti ári teń quqyqty negizde júzege asyrylady. Oǵan memlekettik bıýdjetten qarajat bólinbeıdi jáne ózara is-qımyl tek aqparattyq sıpatqa ıe.
Aıta keteıik, buǵan deıin elimizde áleýmettik mańyzy bar azyq-túlik taýarlaryna belgilengen saýda ústemesin asyra qosqandar kóbeıgeni habarlanǵan bolatyn. Mundaı taýarlarǵa saýda ústemesiniń shekti mólsheri 15% bolyp belgilengen.