Qazaqstandyqtar 2026 jylǵy fýtboldan álem chempıonatynda kimge jankúıer bolady

Qazaqstan quramasy álem chempıonatynyń fınaldyq kezeńine joldama ala almady. Soǵan qaramastan, elde jahandyq fýtbol dodasyna degen qyzyǵýshylyq joǵary. Qazaqstandyq jankúıerler áleýmettik jelilerde óz tańdaýlaryn belsendi túrde talqylap jatyr. Pablıkterde, Instagram reels formatyndaǵy vıdeolarda jáne sporttyq Telegram-arnalarda pikirler birneshe negizgi topqa bólingen.

Eń basty trendterdiń biri — Ózbekstan quramasyn qoldaýǵa arnalǵan heshtegter men jazbalardyń jappaı taralýy. Qaznette Ózbekstan quramasyn qoldaýǵa baǵyttalǵan aýqymdy aktsııa óris alyp, qoldanýshylar «shyn júrekpen jankúıer bolamyz» degen jazbalardy belsendi taratyp jatyr.

Messı men Ronaldýdyń jeke jankúıerleri de shet qalǵan joq. Dástúrli túrde Argentına men Portýgalııa quramalaryn qoldaıtyn myńdaǵan jankúıer pikir qaldyryp jatyr. Eki ańyz fýtbolshy úshin de bul álem chempıonaty mansaptaǵy sońǵy akkord bolýy múmkin.

Sondyqtan qazaqstandyq ınternet qoldanýshylary arasynda «Leo kýbokty ekinshi ret kótere ala ma?» nemese «Ronaldý fýtbolshy retinde alǵash ári sońǵy ret álem chempıony atana ma?» degen taqyryptar qyzý talqylana bastady.

Іri sporttyq medıa platformalardaǵy pikirlerge qaraǵanda, qazaqstandyqtardyń bir bóligi dástúrli favorıtterge — Brazılııa, Frantsııa, Anglııa, Argentına, Portýgalııa jáne Germanııa quramalaryna qoldaý bildiredi.

Kazinform tilshisi tildesken qazaqstandyqtar álem chempıonatynda qaı quramalarǵa jankúıer bolatynyn aıtty.

Almaty qalasynyń 32 jastaǵy Qaırat esimdi turǵyny eki quramaǵa jankúıer bolatynyn aıtty. Alaıda onyń ókinishine qaraı, bul eki komanda toptyq kezeńde bir topta óner kórsetedi.

— Men Portýgalııa men Ózbekstan quramalarynyń jankúıermin. Biraq olar bir topta oınaıdy. Meniń kóptegen dosym Ózbekstandy qoldaıdy. Eger olar jaqsy nátıje kórsetse, bul qazaqstandyq fýtbol úshin de úmit syılaıdy dep oılaımyn. Kórshilerimiz qalyptasqan stereotıpterdi buzady dep senemin. Al Portýgalııa dese — Krıshtıaný Ronaldý eske túsedi. Bul chempıonat onyń mansabyndaǵy Last dance of king bolýy múmkin, — dedi ol.

Kókshetaý qalasynyń 27 jastaǵy Aısulý esimdi turǵyny fýtbol men ózge de sport túrlerin turaqty túrde qadaǵalap otyrady. Onyń pikirinshe, týrnırdi qabyldaýshy elderdiń quramalaryn da elemeýge bolmaıdy.

— Qazirgi quramyna qarasaq, Ispanııa men Frantsııa eń myqty komandalardyń qatarynda. Maǵan Mbappeniń oıyny unaıdy. Biraq ótken álem chempıonatyndaǵydaı tosyn syı jasaıtyn komanda da bolýy múmkin. Men Frantsııa men Kanada quramalaryna jankúıer bolamyn, — dedi ol.

Qazaqstandyq jankúıerler ózderiniń tańdaýlarynan bólek, áleýmettik jelilerde jumys kestesi men matchtardy kórý ýaqytyn qalaı úılestirýge bolatynyn da talqylap jatyr. Ýaqyt aıyrmashylyǵyna baılanysty oıyndardyń kópshiligi Qazaqstanda túnde nemese tańerteń erte kórsetiledi. Soǵan qaramastan, jankúıerler álem chempıonatynyń matchtaryn kórý úshin uıqydan da bas tartýǵa daıyn ekenderin jazǵan.

Sondaı-aq ınternet qoldanýshylary QR Syrtqy ister mınıstrligi men Densaýlyq saqtaý mınıstrliginiń Soltústik Amerıkadaǵy qaýipsizdikke qatysty usynymdaryn talqylap jatyr. Onyń ishinde Meksıkadaǵy denge qyzbasy jónindegi eskertýler men vızalyq rejım erekshelikteri de bar.

Buǵan deıin Qazaqstannan AQSh, Kanada nemese Meksıkaǵa álem chempıonaty matchtaryna barý qansha turatyny týraly habarlanǵan bolatyn.

Sonymen qatar álem chempıonatynyń ashylýyn qaıdan kórýge bolatynyn jazǵan edik.