Qazaqstandyqtar 2023 jyly HQKO arqyly qansha tólqujat pen jeke kýálik aldy

Qazaqstandyqtar 2023 jyly HQKO arqyly 2,6 mln astam tólqujat pen jeke kýálik aldy, dep habarlaıdy Kazinform. 

«Azamattarǵa arnalǵan úkimet» memlekettik korporatsııasy» KEAQ-tan túsken málimetke qaraǵanda, 2022 jyly 2,3 mıllıon azamatqa jeke basyn kýálandyratyn qujat berilgen bolatyn.

Batys Qazaqstan oblysy fılıalynda 2023 jyly 88 546 myńnan astam tólqujat pen jeke kýálik (2022 jyly – 78 226) tabys etildi.

Al Astana men Almaty qalalarynda ornatylǵan qujattama termınaldary arqyly sońǵy bir jylda 19 myńǵa jýyq adam ótinish bergen.

«Termınaldar ýaqytty únemdeıdi jáne birneshe mınýt ishinde ótinish berýge múmkindik beredi. Azamattardyń yńǵaılylyǵy – bizdiń jumysymyzdyń basymdyǵy jáne biz memlekettik qyzmetterdi kórsetýdi odan ári jetildirip, árbir qazaqstandyq úshin múmkindiginshe tıimdi jáne jedel bolatyndaı etemiz», - dedi «Azamattarǵa arnalǵan úkimet» memlekettik korporatsııasy» KEAQ basqarma tóraǵasy Arman Kenjeǵalıev.

Vedomstvo málim etkenindeı, 2024 jylǵa kelesideı memlekettik baj alymy belgilendi: QR azamatynyń 36 paraqty tólqujaty úshin – 8 AEK, 48 paraqty tólqujat úshin – 12 AEK, 24 paraqty tólqujat úshin (16 jasqa deıingi balalarǵa) – 4 AEK. Jeke kýálik úshin tólem 0,2 AEK.

Aıta keteıik, ótken jyly tólqujattar men jeke kýálikterdi berý suranystaǵy úshinshi memlekettik qyzmet qatarynan tabyldy.