Qazaqstandyqtar 18 trln teńgege nesıe alǵan

Tutyný nesıesin berý segmentinde keıingi úsh jylda ósim baıqaldy. Bul týraly Májiliste «Halyqtyń shamadan tys kredıt alýyn azaıtý jáne qarjy saýattylyǵyn arttyrý» taqyrybyndaǵy Parlament tyńdaýynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy Kazinform.

«Jeke adamdardyń nesıeleriniń jalpy kólemi 18 trln teńgeni, al qaryz alýshylardyń sany 8 mıllıonnan astam adamǵa jetti. Tutyný nesıesin berý segmentinde keıingi úsh jylda ósim baıqaldy», – dedi M. Ábilqasymova.

Onyń sózine qaraǵanda, Ulttyq banktiń deregine sáıkes 2021 jyldan bastap kepilsiz tutyný nesıeleriniń ortasha jyldyq ósimi 33 paıyzdy qurady. Bıylǵy 8 aıda tutyný nesıeleriniń portfeli 9,2 trln teńgeden asty.

«Ekinshi deńgeıli bankterdiń problemaly qaryzdarynyń deńgeıi 5,2 paıyzǵa jetti nemese 0,5 trln teńgeden asty. Al merzimi ótken kredıti bar qaryz alýshylar sany 516 myń adamǵa jetti, ıaǵnı qaryz alǵandardyń jalpy sanynyń 7 paıyzyn qurady», – dedi agenttik basshysy.

Budan buryn habarlanǵandaı, Qazaqstanda tutyný nesıesiniń eń joǵary somasyna shekteý qoıylmaq.