Qazaqstandyqtar 110 mlrd teńge qaryzyn keshirýdi suraǵan - Qarjy mınıstrligi
Qazaqstandyqtar sottan tys bankrottyq týraly 67 myńnan astam aryz, sotqa bankrottyq týraly 1 myńnan astam talap aryz berdi. Bankrottyq týraly ótinishterdiń basym bóligin Túrkistan jáne Almaty oblystarynyń turǵyndary bergen. QazAqparat bul týraly QR Qarjy mınıstrligi «Aqparattyq-esepteý ortalyǵy» AQ baspasóz qyzmetine silteme jasap habarlaıdy.
Belgili bolǵandaı, 2023 jyldyń naýryz aıynda prezıdent tapsyrmasy boıynsha jeke tulǵalardy bankrot dep taný týraly ótinishterdi qabyldaý bastaldy. Bul rette, qyrkúıek aıynyń sońynda, ıaǵnı mehanızm jumys istegen 7 aı ishinde 3 768 ótinish berýshi bankrot dep tanyldy.
“Sottan tys bankrottyq rásimi de, sottaǵy bankrottyq ta - óte uzaq rásimder. Aryz berýden memlekettik organdardyń nemese sottardyń sheshimine deıin bankrottyqty taný protsesi 6 aı nemese odan da kóp ýaqytqa sozylýy múmkin. Birinshi jaǵdaıda, rásim bankterge, mıkroqarjy uıymdaryna jáne ınkassatorlarǵa 1600 AEK-ten aspaıtyn bereshegi bar, ıaǵnı 5,5 mln teńgeni quraıtyn, bereshegin bir jyldan astam ýaqyt ótemegen jáne múlki joq boryshkerlerge arnalǵan. Bir jyldan astam tólem jasalmaǵan, qaryz somasy 5,5 mln teńgeden asatyn qaryzdyń barlyq túrleri boıynsha boryshker sotta bankrot dep tanylýy múmkin. Eki mehanızm úshin de qaryz alýshy men nesıe berýshiniń buryn kelisimge kelýge tyrysýy mańyzdy, mysaly, eger boryshker ósimpuldy esepteýdi toqtata turý týraly ótinish berse”,- delingen habarlamada.
Eger qaryz alýshynyń jalǵyz baspanasy kepilge qoıylsa, nesıe berýshi ony alyp qoıýǵa jáne onyń aldyndaǵy qaryzdaryn jabý úshin satýǵa quqyly ekeni atap ótilgen. Jalǵyz baspana kepilge qoıylmasa, nesıe berýshi ony talap ete almaıdy.
Ótinim «E-Gov.kz» elektrondy úkimet portaly nemese «E-SALYQ AZAMAT» mobıldi qosymshasy arqyly qabyldanady. Ótinimderdi óńdeý, ótinish berýshilerge ball qoıý (tekserý) memlekettik derekter bazasy arqyly tikeleı jumysty Qoldau.kz memlekettik tsıfrlyq platformasynda ornalasqan «Tazalau» elektrondy servısi júzege asyrady.