Qazaqstandyqtar 1 qańtardan bastap Túrkııaǵa jeke kýálikpen bara ala ma — SІM jaýap berdi
ASTANA. KAZINFORM — Syrtqy ister mınıstrligi 2027 jylǵy 1 qańtardan bastap Túrkııaǵa jeke kýálikpen barýǵa bolady degen aqparatqa túsinikteme berdi, dep habarlaıdy Kazinform tilshisi.
Buǵan deıin Threads áleýmettik jelisinde 2027 jyldyń basynan bastap Túrki memleketteri uıymyna (TMU) múshe elderdiń azamattary bir-birine pasportsyz qatynaı alady degen aqparat taraǵan. Ol úshin jeke kýálik jetkilikti bolatyny jazylǵan.
Kazinform tilshisi osy aqparatqa qatysty Syrtqy ister mınıstrligine saýal joldady.
Vedomstvonyń málimetinshe, bul másele TMU aıasynda talqylanǵan. Alaıda taraptar ázirge ortaq kelisimge kelgen joq.
— Qazirgi ýaqytta TMU-ǵa múshe memleketter arasynda bul bastamany iske asyrýǵa qatysty ortaq kelisim joq. Sondyqtan 2027 jylǵy 1 qańtardan bastap TMU elderi azamattarynyń jeke kýálikpen ózara qatynaýyna múmkindik beretin tártip engiziledi degen aqparat rastalmaıdy, — dep habarlady SІM.
Jańa tártiptiń qashan engiziletini ázirge belgisiz.
Aıta keteıik, TMU quramyna Qazaqstan, Ázerbaıjan, Qyrǵyzstan, Túrkııa jáne Ózbekstan kiredi.
Qazaqstan atalǵan elderdiń barlyǵymen vızasyz rejım ornatqan. Biraq jeke kýálikpen tek Qyrǵyzstanǵa barýǵa bolady. Qalǵan memleketterge pasport qajet.
Qazaqstan men Ózbekstan shekaradan jeke kýálikpen ótý múmkindigin de talqylap jatyr. Qazir kórshi elge barý úshin sheteldik pasport qajet. Jańa tártiptiń engiziletin merzimi anyqtalǵan joq.
Sonymen qatar Qazaqstan azamattary Armenııaǵa jeke kýálikpen bara alady. Bul múmkindik 2025 jylǵy 22 qarashadan bastap qoldanylady. Ol eki el arasyndaǵy tikeleı áýe reısterine qatysty.
Jeke kýálikpen Astana — Erevan — Astana jáne Almaty — Erevan — Almaty baǵyttarynda ushýǵa bolady.
Buǵan deıin Indonezııa Qazaqstan azamattaryna 30 kúnge deıin vızasyz júrýge múmkindik bergeni habarlanǵan edi.
Sondaı-aq 15 qyrkúıekten bastap Taıland 93 eldiń azamattary úshin vızasyz bolý merzimin 30 kúnge deıin qysqartty. Olardyń qatarynda Qazaqstan da bar.
