Qazaqstandyq jýrnalıst Indıra Jylqyaıdarova ómirden ozdy
ASTANA. KAZINFORM — «Habar» telearnasynyń jýrnalısi Indıra Jylqyaıdarova ómirden ótti. Bul týraly jýrnalıstiń áriptesteri áleýmettik jelilerge jazyp, qaza týraly aqparat taratty.
— Indıra Jylqaıdarova ómirden ótti… Biz Indıramen 7-arnada birge jumys istedik. Ol óte meıirimdi, janashyr, únemi kúlimdep júretin jan edi. Óz isine adal, kásibı deńgeıi joǵary, myqty jýrnalıst bolatyn. Bir kezderi redaktsııanyń kúndelikti tirshiligin, efır men jumystyń qyzyǵy men shyjyǵyn birge bólisken jas áriptesteriń týraly osyndaı qaraly habar estý óte aýyr… Jatqan jeriń jaıly bolsyn, Indıra! Jarqyn beıneń máńgi jadymyzda qalady, — dep jazdy belgili telejúrgizýshi Sándi Sultan Facebook paraqshasyna.
Áriptesteriniń aıtýynsha, jýrnalıst sońǵy jyldary aýyr dertpen kúresken.
— Dúnıe jalǵan….Myna aspan, qala men dala, tirshiliktiń bári jalǵan, bári qalady… Ómirdi bitpeıtindeı, kúnimiz taýsylmaıtyndaı oılaımyz… Janymyzdaǵy adamdar únemi birge júretindeı senemiz. Alystasa, qaıta jolyǵamyz dep oılaımyz. Biraq ár sát, ár adamnyń baǵaly ekenin umytyp ketemiz. Átteń….Jarqyraǵan Indırany da solaı oıladyq, ortamyzǵa oralady, qaıtadan jaınap, qadamyn nyq basyp, basyn tik ustap, ótkir suraqtarymen Úkimet, Parlamentten myqty sıýjetterin Khabartv «Jańalyqtary», «Jeti kúnde» jazady dep sendik. Jalǵan ómir aı… Ol bolmysy bólek, minezdi qyz edi. Jazýy bólek edi. Eshkimge uqsatpaı jazǵandy unatatyn. Mátinin maqtasań balasha qýanatyn. Syrqattanǵaly jelide habarlasyp jaza qalsań, lezde jaýap beretin, qýanyp….Oralǵym keledi tezirek ortalaryńyzǵa deıtin… Kóp arman-tilegi oryndalmady aý, — dep jazdy áriptesi Baǵdat Abdýhojaeva.
Aıta keteıik, tanymal telejýrnalıst Tileýqabyl Myńjasar tamyz aıynda dúnıeden ótken edi.
