Qazaqstandyq jumys berýshilerdiń jumysshylar aldynda bereshegi qansha

ASTANA. KAZINFORM — Elimizde jumys berýshilerdiń qyzmetkerler aldyndaǵy bereshegi anyqtaldy. Tolyǵyraq Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıteti tóraǵasynyń orynbasary Erbolat Abýlhatın aıtyp berdi.

— Elimizde eńbek táýekeli kartasy bar, táýekelder qataryna jalaqy men zeınetaqy aýdarymy boıynsha bereshek jatady. Búginde respýblıka boıynsha jumys berýshilerdiń jumysshylar aldynda 873 mıllıon teńge bereshegi bar, — dedi Erbolat Abýlhatın ortalyq kommýnıkatsııalar qyzmeti alańynda ótken baspasóz máslıhatynda.

Eńbek mınıstrligi ókiliniń málimdeýinshe, bereshegi kóp óńirler qatarynda Almaty, Atyraý jáne Jambyl oblysy bar.

— Jalaqy bereshegi memlekettik eńbek ınspektorlary tarapynan josparly tekserý barysynda, sondaı-aq jumysshylardyń ótinishi negizinde jáne jospardan tys tekserý kezinde anyqtalady. Kásiporyndardyń eńbekaqyny ýaqytyly tóleý protsesin tekserýge ýákiletti organdarmen qatar prokýratýra qatysady. Taǵy bir jaıt, eger kásiporynnyń jumysshylarǵa bereshegi 3 aıdan assa, memlekettik eńbek ınspektory májbúrli túrde óndirý úshin materıaldy jeke sot oryndaýshysyna joldaıdy, — deıdi vedomstvo mamany.

Atalǵan brıfıng barysynda belgili bolǵandaı, endi zeınetaqy jınaǵy bar jumysshy qazaqstandyqtar ǵana eńbekpen qamtylǵan bolyp esepteledi. 

Sondaı-aq Eńbek mınıstrliginiń ókili 4 kúndik jumys aptasy jaǵdaıynda eńbekaqy qalaı esepteletinin túsindirdi.