Qazaqstandyq JOO stýdentterine ASU qandaı múmkindik usynyp otyr
ASTANA. KAZINFORM – Búgin elordada HackAlem AI halyqaralyq hakatony ótip jatyr. Іs-shara aıasynda Arizona State University-diń jahandyq seriktestikterdi damytý jáne halyqaralyq akademııalyq bastamalar baǵytynyń aǵa dırektory Krıs Djonson Qazaqstandaǵy bilim berý múmkindikteri týraly aıtyp berdi.
Onyń sózinshe, qazaqstandyq stýdentter ASU oqý baǵdarlamalary boıynsha elden shyqpaı-aq bilim ala alady. Qazir AQSh ýnıversıteti Qazaqstandaǵy eki joǵary oqý ornymen seriktestik ornatqan.
Qazir ASU Almatydaǵy Innotech University jáne Shymkenttegi M.Áýezov atyndaǵy Ońtústik Qazaqstan ýnıversıtetimen jumys isteıdi. Seriktestik aıasynda stýdentter amerıkalyq ýnıversıtettiń oqý baǵdarlamalaryn meńgerip, zamanaýı mamandyqtar boıynsha bilim alý múmkindigine ıe.
– Stýdentterge Qazaqstannan ketip, Arızonaǵa barýdyń qajeti joq. Olar munda, ıaǵnı Almatyda nemese Shymkentte bilim ala alady. Árıne, biz stýdentterdi AQSh-ta da qýana qarsy alamyz. Biraq olardyń kıberqaýipsizdik, bıznestegi jasandy ıntellekt jáne basqa da zamanaýı baǵyttardy osynda oqı alatyny biz úshin mańyzdy, - dedi Krıs Djonson.
Onyń aıtýynsha, qazirgi eńbek naryǵynda bir baǵytty meńgerý jetkiliksiz. Jasandy ıntellekt tehnologııalary damyǵan saıyn ártúrli salanyń bilimin ushtastyra alatyn mamandarǵa suranys artyp keledi.
– Jasandy ıntellekt dáýirinde tek baǵdarlamalaýdy bilý nemese, mysaly, jaqsy býhgalter bolý jetkiliksiz. Ártúrli daǵdyny ushtastyrý qajet. Óz ıdeıańdy jetkize bilý, aýdıtorııany qyzyqtyrý jáne adamdardy soǵan tarta bilýdiń mańyzy zor, - dedi ol.
ASU qazaqstandyq jastarǵa ýnıversıtet baǵdarlamalarynan bólek, qysqa merzimdi bilim berý múmkindikterin de usynyp otyr. Ýnıversıtet HackAlem AI hakatonynyń demeýshileriniń biri retinde barlyq qatysýshyǵa ASU-dyń kásipkerlik kýrsyna jazylýǵa múmkindik bergen.
Krıs Djonsonnyń sózinshe, mundaı baǵdarlamalardyń maqsaty tek dıplom alýmen shektelmeıdi. Stýdent oqý barysynda keıin jumysynda nemese jeke jobasynda qoldana alatyn tájirıbe men naqty daǵdylar jınaýy kerek.
– Tehnıkalyq daǵdylar áli de óte mańyzdy. Biraq sonymen birge kásipkerlik oılaýdy damytý qajet. Qoldaǵy ıdeıa men tehnıkalyq daǵdyny ónimge qalaı aınaldyrýǵa bolady? Qalaı naqty sheshim jasaýǵa bolady? Stýdentter osyndaı suraqtardy ózine qoıa bilýi kerek, – dedi ASU ókili.
Qazaqstandaǵy seriktestik ázirge bastapqy kezeńde. Ýnıversıtet aldymen Almaty men Shymkenttegi baǵdarlamalardyń nátıjesine nazar aýdarmaq. Sonyń ishinde stýdentterdiń bilim sapasy men oqý aıaqtalǵannan keıin jumysqa ornalasýy eskeriledi.
– Biz qazir ǵana bastap jatyrmyz. Innotech University jáne M.Áýezov atyndaǵy Ońtústik Qazaqstan ýnıversıtetimen seriktestik ornatqanymyzǵa kóp ýaqyt bolǵan joq. Eń aldymen osy baǵdarlamalardyń sátti jumys isteıtinine, stýdentterdiń sapaly nátıje alyp, jaqsy jumys tabatynyna kóz jetkizgimiz keledi. Odan keıin Qazaqstanda, Ózbekstanda jáne jalpy óńirde stýdentterdi qoldaýdyń basqa múmkindikterin izdeımiz, - dep túıindedi Krıs Djonson.
Aıta keteıik, búgin bastalǵan HackAlem AI hakatonyna 2500-den astam adam qatysyp jatyr. Olar bes saǵat ishinde ekonomıkanyń 10 baǵytynyń biri boıynsha jumys isteıtin jasandy ıntellekt agentin ázirleýi kerek.
Hakaton fınalısteri 29 qyrkúıekte Demo Day aıasynda óz jobalaryn tanystyrady. Jeńimpazdar 1 qazanda AI & Digital Bridge 2026 alańynda marapattalady.
