Qazaqstandyq JOO-larda ChatGPT Edu engiziledi
ASTANA. KAZINFORM – Elordada Bilim berý sapasyn qamtamasyz etý jónindegi X Ortalyq Azııa halyqaralyq forýmy ótip jatyr. Jıynda Ǵylym jáne joǵary bilim vıtse-mınıstri Talǵat Eshenqulov qazaqstandyq joǵary oqý oryndaryna ChatGPT Edu engizý jumysy týraly aıtyp berdi.
Onyń aıtýynsha, joba Ǵylym jáne joǵary bilim mınıstrligi, Tsıfrlandyrý jáne jasandy ıntellekt mınıstrligi, Oqý-aǵartý mınıstrligi, OpenAI, Freedom Holding Corporation jáne «Qazaqtelekom» arasyndaǵy memorandým aıasynda júzege asyrylyp jatyr.
- Joba professor-oqytýshylar quramyna, JOO qyzmetkerlerine, ǵylymı qyzmetkerlerge jáne «AI-Sana» baǵdarlamasyna qatysýshylarǵa jasandy ıntellektini tegin ári qaýipsiz paıdalanýǵa múmkindik beredi, – dedi Talǵat Eshenqulov.
Vıtse-mınıstr joǵary bilim berý salasynda jasandy ıntellektini qoldaný baǵytynda atqarylyp jatqan basqa da jumystarǵa toqtaldy. Qazir «AI-Sana» baǵdarlamasy boıynsha 670 myńnan astam stýdent bilim alǵan. Jobany óńirlerde júzege asyrýǵa 27 JOO jaýapty.
- Jasandy ıntellekt salasynda JOO aralyq standart qabyldanyp, 38 bilim berý baǵdarlamasy iske asyrylyp jatyr. Budan bólek, qazaqstandyq ýnıversıtetter 308 AI-agent ázirledi. Olar talapkerlerdi qabyldaýdan bastap oqý protsesin uıymdastyrýǵa jáne stýdentterdiń oqýyn aıaqtaýyna deıingi túrli jumystarda qoldanylady, - dedi spıker.
Talǵat Eshenqulov bul bastamalar stýdentter men oqytýshylardyń jasandy ıntellektini paıdalaný múmkindigin keńeıtetinin atap ótti.
Aıta keteıik, buǵan deıin elimizde bıylǵy 1 qyrkúıekten bastap shaǵyn jınaqty mektepterge jasandy ıntellektini engizý boıynsha pılottyq joba iske qosylǵany habarlandy.
