Qazaqstandyq JOO-lar talapkerlerge 2 myńnan astam qosymsha grant usynady
ASTANA. KAZINFORM – Qazaqstannyń joǵary oqý oryndary memlekettik bilim berý granttarynan bólek, talapkerlerge 2 myńnan astam rektorlyq, ýnıversıtettik jáne ishki bilim berý grantyn, sondaı-aq oqý aqysyna jeńildikter men ataýly stıpendııalar usynady, dep habarlaıdy Ǵylym jáne joǵary bilim mınıstrligi.
Respýblıkalyq bıýdjet jáne jergilikti atqarýshy organdar qarajaty esebinen bólinetin memlekettik bilim berý granttarynan bólek, elimizdiń joǵary oqý oryndarynda talapkerlerdi qoldaýǵa arnalǵan ózindik baǵdarlamalar bar.
– 2026 jyly joǵary oqý oryndary usynatyn rektorlyq, ýnıversıtettik jáne ishki bilim berý granttarynyń jalpy sany eki myńnan asady. Granttardy berý talaptaryn ár ýnıversıtet derbes belgileıdi. Іrikteý kezinde Ulttyq biryńǵaı testileý nátıjeleri, akademııalyq jetistikter, «Altyn belgi» ıegeri bolýy, olımpıadalar men ǵylymı, shyǵarmashylyq jáne sporttyq jarystardaǵy nátıjeler, sondaı-aq talapkerdiń áleýmettik jaǵdaıy eskeriledi, – delingen mınıstrlik málimetinde.
Eń iri baǵdarlamalardyń biri Qoja Ahmet ıAsaýı atyndaǵy Halyqaralyq qazaq-túrik ýnıversıtetinde júzege asyrylady. 2026-2027 oqý jylyna Túrkııa Respýblıkasy tarapynan 500 dástúrli bilim berý kvotasy bólingen. Qujattar 2026 jylǵy 10-15 tamyz aralyǵynda qabyldanady. Konkýrsqa memlekettik bilim berý granty konkýrsyna qatysýǵa jaramdy UBT sertıfıkaty bar jáne ýnıversıtet belgilegen shekti baldy jınaǵan Qazaqstan azamattary qatysa alady.
Qorqyt ata atyndaǵy Qyzylorda ýnıversıteti IT baǵytyndaǵy olımpıadalar, jobalar men konkýrstardyń jeńimpazdaryna 125 ishki grant bóldi. Sonymen qatar jetim balalar men ata-anasynyń qamqorlyǵynsyz qalǵan balalarǵa arnalǵan uıymdardyń jáne «Atameken» otbasy úlgisindegi balalar aýylynyń eki túlegine oqýdyń tolyq merzimine 100 paıyzdyq bilim berý granty usynyldy.
Dáýlet Serikbaev atyndaǵy Shyǵys Qazaqstan tehnıkalyq ýnıversıtetinde ózindik konkýrstyq baǵdarlamalar aıasynda 94 grant qarastyrylǵan. Onyń ishinde EKTU QUIZ-2026 qorytyndysy boıynsha Jetisý, Túrkistan jáne Qyzylorda oblystarynyń mektep túlekterine tórt jylǵa 24, eki jylǵa 24 jáne bir jylǵa 24 grant beriledi.
«Aqyldy Awards 2026» konkýrsy boıynsha «Altyn belgige» úmitkerlerge tórt jylǵa 18 grant bólingen. Qyrǵyz Respýblıkasynyń mektep túlekterine arnalǵan EKTU STAR 2026 jáne «EKTU-dy tańda – bolashaqty tańda» baıqaýlary boıynsha tórt jyldyq tórt grant qarastyrylǵan.
Ábilqas Saǵynov atyndaǵy Qaraǵandy tehnıkalyq ýnıversıteti 2026-2027 oqý jylyna rektordyń 19 grantyn bóldi. Onyń beseýi jetim balalar men ata-anasynyń qamqorlyǵynsyz qalǵan jastarǵa, úsheýi memlekettik bilim berý granty konkýrsynda jeńimpaz bolmaǵanymen, UBT-dan 100-den joǵary ball jınaǵan talapkerlerge beriledi.
Taǵy alty grant «Daryn» respýblıkalyq ǵylymı-praktıkalyq ortalyǵy uıymdastyrǵan olımpıadalardyń jeńimpazdaryna, bes grant IQanat High School of Burabay mektebiniń fızıka, matematıka, bıologııa, hımııa jáne ınformatıka pánderi boıynsha ishki olımpıadalarynda birinshi oryn alǵandarǵa arnalǵan.
Daryndy talapkerlerdi qoldaý maqsatynda S. Ótebaev atyndaǵy Atyraý munaı jáne gaz ýnıversıteti jalpy bilim beretin pánder boıynsha oblystyq olımpıadalardyń jeńimpazdary men «Zerdeli» mektepteriniń túlekterine 20 rektorlyq bilim berý grantyn bóldi. Granttar talantty jastardy qoldaýǵa, sapaly joǵary bilimge qoljetimdilikti keńeıtýge jáne olardyń kásibı áleýetin damytýǵa baǵyttalǵan.
Sársen Amanjolov atyndaǵy Shyǵys Qazaqstan ýnıversıtetinde 12 grant qarastyrylǵan. Al Rýdnyı ındýstrııalyq ýnıversıtetinde jetim balalarǵa, ata-anasynyń qamqorlyǵynsyz qalǵan balalarǵa, az qamtylǵan, tolyq emes jáne kópbalaly otbasylardan shyqqan talapkerlerge rektordyń 10 granty beriledi.
Qaraǵandy ındýstrııalyq ýnıversıtetinde aqyly negizde oqıtyn stýdentterge birinshi kýrstan keıin ýnıversıtet qarajaty esebinen oqýyn jalǵastyrýǵa múmkindik beretin «QarIÝ bilim berý granty» qoldanylady. Grant joǵary akademııalyq nátıje kórsetken jáne qoǵamdyq ómirge belsendi qatysatyn stýdentterge GPA kórsetkishi negizinde beriledi.
Sondaı-aq 2026-2027 oqý jylynda ýnıversıtette Narıman Ishmuhamedov atyndaǵy ataýly grant alǵash ret taǵaıyndaldy. Ol oqý aqysyn tolyq óteýdi jáne aı saıyn 150 myń teńge kóleminde stıpendııa tóleýdi kózdeıdi. Úmitkerdiń UBT nátıjesi keminde 75 ball bolýy, basym bilim berý baǵdarlamasyna túsýi jáne Temirtaý qalasymen nemese Qaraǵandy oblysymen aýmaqtyq baılanysy bolýy tıis.
Satbayev University áleýmettik osal toptardan shyqqan daryndy jastardyń joǵary tehnıkalyq bilimge qoljetimdiligin keńeıtý maqsatynda jumys berýshiler men jer qoınaýyn paıdalanýshy kompanııalardyń bilim berý granttaryn tartady.
2025-2026 oqý jylynda jasalǵan kelisimder aıasynda 538-den astam stýdentke qarjylyq qoldaý kórsetilip, olar oqýyn jer qoınaýyn paıdalanýshy kompanııalardyń qoldaýymen jalǵastyrdy. Olardyń qatarynda jetim balalar, múgedektigi bar tulǵalar, ata-anasynyń qamqorlyǵynsyz qalǵan balalar, ata-anasynyń biri nemese ekeýi de múgedektigi bar otbasylardan shyqqan stýdentter, sondaı-aq tolyq emes jáne kópbalaly otbasylardan shyqqan bilim alýshylar bar.
Sonymen qatar ýnıversıtet stýdentterge óz qarajaty esebinen bilim berý granttary men oqý aqysyna jeńildikter usynady.
Abaı atyndaǵy Qazaq ulttyq pedagogıkalyq ýnıversıtetinde ýnıversıtet grantyna UBT-dan keminde 100 ball jınaǵan talapkerler úmitker bola alady. Іrikteý barysynda UBT nátıjesi, «Altyn belgi» ıegeri bolýy, áleýmettik jaǵdaıy, respýblıkalyq jáne halyqaralyq olımpıadalardaǵy, konkýrstar men ǵylymı jobalar jarystaryndaǵy jetistikteri eskeriledi.
Qujat qabyldaý memlekettik bilim berý granty ıegerleriniń tizimi jarııalanǵan kúnnen bastalyp, 18 tamyzǵa deıin jalǵasady.
«Turan-Astana» ýnıversıtetinde UBT-dan 100-den joǵary ball jınaǵan «Altyn belgi» ıegerlerine oqýdyń tolyq merzimine rektor granty beriledi.
Ózbekáli Jánibekov atyndaǵy Ońtústik Qazaqstan pedagogıkalyq ýnıversıtetinde memlekettik grant ıelenbegen, UBT-dan 100-den joǵary ball jınaǵan «Altyn belgi» ıegerlerine 100 paıyzdyq jeńildik qarastyrylǵan. 2026-2027 oqý jylyna rektor grantyn alýshylardyń naqty sany Ǵylymı keńestiń sheshimimen anyqtalady.
Álkeı Marǵulan atyndaǵy Pavlodar pedagogıkalyq ýnıversıtetinde granttardyń naqty sany belgilenbegen. «6V015 – Jaratylystaný pánderi boıynsha pedagogterdi daıarlaý» baǵytyna túsken «Altyn belgi» ıegerlerine GPA kórsetkishin 3,5 deńgeıinen tómendetpegen jaǵdaıda oqýdyń tolyq merzimine 100 paıyzdyq jeńildik beriledi.
Keıbir ýnıversıtetterde rektor granttarynyń ornyna oqý aqysyna jeńildikter júıesi qoldanylady. Máselen, Ahmet Baıtursynuly atyndaǵy Qostanaı óńirlik ýnıversıtetinde «Qamqor», «Kómek», «Járdem» jáne «Zerek» jeńildikteri bar. Olar jetim balalarǵa, múgedektigi bar stýdentterge, bir otbasynan qatar bilim alyp jatqan stýdentterge, ýnıversıtet qyzmetkerleriniń balalaryna jáne «Altyn belgi» ıegerlerine beriledi. Jeńildik mólsheri 15 paıyzdan 100 paıyzǵa deıingi aralyqty qamtıdy.
Halel Dosmuhamedov atyndaǵy Atyraý ýnıversıtetinde oqý aqysyna jeńildikter 14 sanat boıynsha beriledi. Áleýmettik qoldaý jetim balalarǵa, múgedektigi bar stýdentterge, az qamtylǵan jáne kópbalaly otbasylardan shyqqan bilim alýshylarǵa, ýnıversıtet qyzmetkerleriniń balalaryna, «Altyn belgi» ıegerlerine, olımpıadalar men sporttyq jarystardyń jeńimpazdaryna jáne basqa da sanattarǵa arnalǵan. Jeńildik mólsheri 20 paıyzdan 100 paıyzǵa deıin jetedi.
Jalpy ýnıversıtetterdiń ózindik granttary men jeńildikteri akademııalyq jetistikteri joǵary talapkerlerdi qoldaýǵa, daryndy jastardy yntalandyrýǵa jáne áleýmettik osal sanattar úshin joǵary bilimniń qoljetimdiligin arttyrýǵa baǵyttalǵan.
Granttar men jeńildikterdiń naqty sany, qujat qabyldaý merzimderi, talaptary jáne qajetti qujattar tizimi ár joǵary oqý ornynda ártúrli. Tolyq jáne ózekti aqparatty talapkerler tańdaǵan ýnıversıtettiń resmı saıtynan nemese qabyldaý komıssııasynan naqtylaı alady.
Aıta keteıik, ákimdik granttaryna qujat qabyldaý bastaldy.
