Qazaqstandyq JOO álemdik reıtıngide úzdikter qataryna endi
ASTANA. KAZINFORM – D.Serikbaev atyndaǵy Shyǵys Qazaqstan tehnıkalyq ýnıversıteti bedeldi QS Stars reıtıngilik júıesinde eń joǵary 5 juldyzdyq baǵalaýǵa ıe bolyp, halyqaralyq deńgeıde mańyzdy jetistikke qol jetkizdi. Bul týraly Ǵylym jáne joǵary bilim mınıstrligi habarlady.
Bul nátıje ýnıversıtet qyzmetiniń joǵary deńgeıde damyǵanyn jáne bilim berý, ǵylym men ınstıtýtsıonaldyq basqarý salalarynda álemdik ozyq standarttarǵa tolyq sáıkes keletinin aıqyn dáleldeıdi.
QS Stars – joǵary oqý oryndaryn keshendi túrde baǵalaıtyn halyqaralyq moıyndalǵan júıe. Ol bilim berý sapasy, ǵylymı zertteýler, ınfraqurylym, turaqty damý, túlekterdiń jumysqa ornalasýy jáne halyqaralyq yqpaldastyq sııaqty negizgi kórsetkishter boıynsha jan-jaqty taldaý júrgizedi.
Baǵalaý nátıjesinde ýnıversıtet oqytý sapasy, ınfraqurylym, túlekterdiń jumysqa ornalasýy, halyqaralyq seriktestik jáne turaqty damý baǵyttary boıynsha eń joǵary 5 juldyzǵa ıe bolyp, óziniń básekege qabilettiligin taǵy bir márte dáleldedi .
– Memleket ýnıversıtetterdi jan-jaqty qoldap, olardyń ınfraqurylymyn jańǵyrtýǵa, ǵylymdy damytýǵa, tsıfrlyq tehnologııalardy engizýge jáne halyqaralyq bilim berý keńistigine ıntegratsııalanýyna barlyq qajetti jaǵdaıdy jasap otyr. Osyndaı strategııalyq qoldaýdyń arqasynda qazaqstandyq joǵary oqý oryndary jahandyq akademııalyq ortada óz pozıtsııalaryn nyǵaıtyp keledi, - delingen habarlamada.
ShQTÝ-dyń QS Stars reıtınginde eń joǵary baǵalanýy elimizdiń joǵary bilim berý júıesiniń áleýetin kórsetip qana qoımaı, Qazaqstannyń halyqaralyq deńgeıdegi bilim berý ortalyǵy retindegi bedelin arttyrýǵa eleýli úles qosady.
Aıta keteıik, Qazaqstan pasporty halyqaralyq reıtıngide 57-orynda tur. Bıyl eldiń pozıtsııasy 4 satyǵa joǵarylaǵan.
