Qazaqstandyq jeńil atlet Tájikstandaǵy halyqaralyq marafonda qola júlde ıelendi
ASTANA. KAZINFORM – Qazaqstandyq jeńil atlet Orazbek Ábdirahmanov Tájikstanda ótken «SEVEN LAKES–2026» halyqaralyq taý ekomarafonynda qola júldege ıe boldy, dep habarlaıdy Kazinform agenttiginiń Dýshanbedegi menshikti tilshisi.
Halyqaralyq jarysqa álemniń 18 elinen 200-den astam sportshy qatysty. Qatysýshylar 3, 10 jáne 21 shaqyrym qashyqtyqtarda baq synady. 21 shaqyrymdyq jarysta alǵashqy eki oryndy jarys qojaıyndary ıelense, qazaqstandyq Orazbek Ábdirahmanov márege úshinshi bolyp keldi.
Orazbek kásibı túrde júgirýmen nebári eki jyl buryn aınalysa bastaǵan. Onyń halyqaralyq deńgeıdegi alǵashqy jarysy 2024 jyly Ózbekstanda ótken Zaamin Ultra marafony boldy. Sol kezde ol 21 shaqyrymdyq qashyqtyqta kúmis júlde jeńip alǵan.
Sportshy Kazinform tilshisine bergen suhbatynda jarystan alǵan áserimen bólisti.
– «SEVEN LAKES–2026» ekomarafony týraly Jetisý oblysynda ótken «Shaǵan taý – 2026» týrnırinde bildim. Ol jarysqa Tájikstannan sportshylar qatysqan edi. Halyqaralyq dodada tájirıbe jınaý úshin baq synap kórýge sheshim qabyldadym. Týrnır 2026 jylǵy 1–2 tamyzda Tájikstannyń eń kórikti óńirleriniń biri – Fan taýlarynyń qaq ortasynda ornalasqan Jeti kól aımaǵynda ótti. Bul ekomarafon álemniń kóptegen elinen kelgen sport súıer qaýymdy, týrısterdi jáne salaýatty ómir saltyn qoldaýshylardy biriktiredi. Júldegerler qataryna enip, Qazaqstannyń namysyn halyqaralyq jarysta abyroımen qorǵaǵanyma qýanyshtymyn, – dedi Orazbek.
Eske salaıyq, buǵan deıin Ázerbaıjannyń Baký qalasynda 17 jasqa deıingi sportshylar arasynda kúres túrlerinen álem chempıonaty aıaqtalǵan bolatyn. Qazaqstan quramasy dúbirli dodada 8 medal jeńip aldy. Onyń ekeýi – altyn, ekeýi – kúmis jáne tórteýi – qola júlde.
