Qazaqstandyq jeńil atlet ereje buzyp jarystan shettetildi

PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda qazaqstandyq jeńil atlet Davıd Efremov 110 metrge kedergiler arqyly júgirý saıysynda ereje buzǵany úshin (ýaqytynan buryn bastap ketý) jarystan shettetildi.

Ol búgin 110 metrge kedergiler arqyly júgirý saıysynan jubanysh kezeńinde synǵa túsýi kerek bolǵan. Alaıda, falstart (ýaqytynan buryn bastap ketý) jasap, dıskvalıfıkatsııa alyp qaldy. Osylaısha jartylaı fınaldyq kezeńnen tys qaldy.

Aıta keteıik, búgin 7 tamyzǵa qaraǵan túni taǵy bir jeńil atletimiz Nora Djerýto 3000 metrge kedergiler arqyly júgirý básekesiniń fınaldyq kezeńinde synǵa túsedi.

Sonymen qatar boksshy Nazym Qyzaıbaı jartylaı fınalda qytaılyq boksshymen synǵa túsedi. Osyǵan deıin onyń qarsylasy týraly jazǵan bolatynbyz.

Esterińizge sala keteıik, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi. Oıynǵa álemniń 205 elinen 10 500 sportshy qatysyp jatyr.

Olımpıadashylar 32 sport túrinen 329 medal jıyntyǵyn sarapqa salyp jatyr.

Qazir Qazaqstan quramasynyń qorjynynda 1 altyn, 1 kúmis, 2 qola medal bar.