Qazaqstandyq jastarǵa óz startaptaryn quryp, álemdik naryqqa shyǵý usynyldy
ASTANA. KAZINFORM — Búgin Astanada HackAlem AI halyqaralyq hakatony bastaldy. Іs-sharanyń ashylýynda Premer-Mınıstrdiń orynbasary — Jasandy ıntellekt jáne tsıfrlyq damý mınıstri Jaslan Madıev jastardy tehnologııa salasynda óz kompanııalaryn quryp, álemdik naryqqa shyǵýǵa shaqyrdy.
Mınıstrdiń aıtýynsha, qazaqstandyq mamandar Kremnıı alqabynyń tájirıbesin zertteýi kerek. Alaıda túpki maqsat shetelge ketý nemese iri kompanııaǵa jumysqa ornalasýmen shektelmeýi tıis.
— Kremnıı alqabynyń tájirıbesin zertteńizder. Biraq bizdiń maqsatymyz — jahandyq kompanııalardy osynda quryp, Qazaqstan ekonomıkasyn jáne Alatau City-di damytý, — dedi Jaslan Madıev.
Ol jastardy memlekettik qyzmet pen ulttyq kompanııalarda jumys isteýdi basty maqsat etpeı, óz kompanııasyn quryp, jańa jumys oryndaryn ashýǵa shaqyrdy.
Madıevtiń sózinshe, búginde Qazaqstanda tehnologııalyq jobalardy damytýǵa qajetti orta qalyptasyp keledi. Sonyń biri — alem.ai ortalyǵy. Munda bilim berý, zertteý júrgizý jáne startaptardy qoldaý baǵyttary bir jerde toǵystyrylǵan.
— TUMO kreatıvti tehnologııalar ortalyǵynda oqýshylar tsıfrlyq jáne kreatıvti tehnologııalardy meńgerse, Tomorrow School eresekterge baǵdarlamalaý men jasandy ıntellektini bastapqy deńgeıden tegin úırenýge múmkindik beredi. Qyrkúıekte kásipkerler, ınjenerler men zertteýshilerdi biriktiretin Network School jumysyn bastady. Al 1 qyrkúıekten bastap Qazaq AI Research University-de oqý bastaldy, — dedi mınıstr.
Sonymen qosa ol qazaqstandyq Higgsfield kompanııasynyń jetistigin de mysalǵa keltirdi. Onyń aıtýynsha, halyqaralyq tájirıbede elden alǵashqy mıllıard dollarlyq startap shyqqannan keıin basqa da osyndaı kompanııalardyń paıda bolýyna jol ashylady.
— Higgsfield jetistigi Qazaqstanda quny 1 mıllıard dollardan asatyn jańa startaptar qurýǵa múmkindik bar ekenin kórsetti. Árqaısyńyz AI-kásipker atanyp, bolashaqta osyndaı kompanııanyń negizin qalaı alasyzdar, — dedi ol.
Jaslan Madıev startap qurý uzaq ýaqytty jáne birneshe kezeńnen turatyn qarjylandyrýdy qajet etýi múmkin ekenin aıtty. Sondyqtan jobany bastaǵan sátten bastap naryqtaǵy suranysty anyqtap, ónimniń óz tutynýshysyn tabýyna mán berý qajet.
— Keı jaǵdaıda startapqa 6-7 kezeńmen ınvestıtsııa tartýǵa týra keledi. Tipti 100 mıllıon dollar qarjy tartqannan keıin de kompanııa damýyn toqtatpaı, tehnologııasyn jetildirip, jańa naryqtarǵa shyǵýy tıis, — dedi spıker.
Mınıstr Qazaqstannyń aldaǵy jyldary damytýǵa basymdyq beretin jańa salalaryn da atady. Olardyń qatarynda jasandy ıntellekt ekonomıkasy, krıptoındýstrııa, aktıvterdi tokenızatsııalaý, ǵarysh salasy bar. Bul baǵytta Alatau City-ge de erekshe mán berilip otyr.
Sonymen birge el krıtıkalyq mıneraldardy tek óndirýmen shektelmeı, olardy tereń óńdeýge basymdyq bermek. Qazaqstan batareıa, chıp jáne jartylaı ótkizgish óndirisindegi jahandyq tizbekten óz ornyn alýdy kózdeıdi.
— Aldaǵy 5-10 jylda osy salalar Qazaqstan ekonomıkasynyń jańa baǵyttaryn damytýǵa eleýli úles qosýy tıis. Ol úshin elge ınjenerler, ázirleýshiler men tehnologııalyq kásipkerler qajet, — dedi Jaslan Madıev.
Aıta keteıik, búgin bastalǵan HackAlem AI hakatonyna 2500-den astam adam qatysyp jatyr. Olar bes saǵat ishinde ekonomıkanyń 10 baǵytynyń biri boıynsha jumys isteıtin jasandy ıntellekt agentin ázirleýi kerek.
Hakaton fınalısteri 29 qyrkúıekte Demo Day aıasynda óz jobalaryn tanystyrady. Jeńimpazdar 1 qazanda AI & Digital Bridge 2026 alańynda marapattalady.
