Qazaqstandyq jastardyń 85%-y eldiń bolashaǵyna senimdi – zertteý
ASTANA. KAZINFORM – QR Prezıdenti janyndaǵy Qazaqstannyń strategııalyq zertteýler ınstıtýty bıyl 11 shilde men 12 tamyz aralyǵynda halyq arasynda saýalnama júrgizdi. Іrikteý jıyntyǵynyń kólemi – 8 000 respondent. Saýalnamaǵa elimizdiń 17 oblysynan jáne respýblıkalyq mańyzy bar – Astana, Almaty, Shymkent qalalarynan 18 jastan asqan azamattar qatysty.
Áleýmettanýlyq zertteý derekterine sáıkes, azamattardyń 75,9%-y búgingi tańda eldiń durys baǵytta damyp kele jatqanyn atap ótken.
Eń joǵary áleýmettik optımızm deńgeıi 18–29 jas aralyǵyndaǵy jastarǵa tán (84,6%). Jas shamasy ósken saıyn eldiń bolashaǵyna qatysty optımızm birshama tómendegenimen, jetkilikti joǵary deńgeıde saqtalady (61 jastan joǵary respondentter arasynda – 70,6%). El damýynyń qazirgi baǵytyn qala turǵyndaryna (73,8%) qaraǵanda aýyl turǵyndary (79,3%) anaǵurlym durys dep sanaıdy.
Eldiń durys baǵytta damyp kele jatqanyn qoldaǵan respondentterdiń basym bóligi qazirdiń ózinde naqty júzege asyrylyp jatqan birqatar mańyzdy reformalardy atap ótti. Olardyń ishinde birneshe topty bólip kórsetýge bolady.
Áleýmettik bastamalar:
— Aýyldyq jáne qalalyq mektepterdi salý men jańartý – 38,2%;
— «Ulttyq qor – balalarǵa» baǵdarlamasyn iske asyrý – 29,5%;
— BJZQ-dan qarajattyń bir bóligin sheship alý múmkindigi – 20,1%.
Ekonomıkalyq reformalar:
- Avtomagıstralderdi, vokzaldar men áýejaılardy salý jáne jóndeý – 18,4%;
- Aýyl sharýashylyǵyn damytý – 13,6%;
- Shaǵyn jáne orta bıznesti qoldaý – 10,3%;
- Otandyq taýar óndirisiniń artýy – 9,7%.
«Zań jáne tártip» qaǵıdatyn jáne «Taza Qazaqstan» jalpyulttyq aktsııasyn júzege asyrý:
- Turmystyq zorlyq-zombylyqpen kúres – 32,6%;
- Eldi mekenderdi tazalaý jáne abattandyrý, vandalızm men mádenıetsizdikke qarsy sharalar – 14,7%;
- Elden zańsyz shyǵarylǵan aktıvter men kapıtaldy qaıtarý – 5,8%.
Eldi tsıfrlandyrý:
- Memlekettik qyzmetterdiń tsıfrlyq formatta damýy – 30,7%;
- Otbasynyń tsıfrlyq kartasyn, áleýmettik ámııandy engizý – 16,1%.
Bul saýalnama nátıjeleri azamattardyń ómiriniń túrli salalarynda naqty ózgeristerdi baıqap otyrǵanyn kórsetedi. Bul óz kezeginde júrgizilip jatqan reformalardyń alǵashqy nátıjesin berip, memlekettik saıasatqa degen qoǵamdyq senimdi nyǵaıtyp, bolashaqqa qatysty optımızmdi arttyrǵanyn ańǵartady.
Ekonomıkalyq reformalar men áleýmettik bastamalardyń tıimdi júzege asyrylýy el basshylyǵyna degen qoǵamdyq senim deńgeıinen kórinis tabýda. Áleýmettanýlyq zertteý derekterine sáıkes, Prezıdent reıtıngtiń aldyńǵy qatarynda tur – saýalnamaǵa qatysqandardyń 82,4%-y oǵan senim bildirgen.
Sonymen qatar, eldegi oń ózgerister patrıottyq kóńil-kúıdiń artýyna tikeleı yqpal etýde. Saýalnamaǵa qatysqan respondentterdiń basym kópshiligi Qazaqstanmen jáne óz azamattyǵymen maqtanatynyn atap ótti – 89,9% («óte maqtanamyn» – 49,1% jáne «maqtanamyn» – 40,8%).
Eldiń bolashaq damýy turǵysynan respondentter Qazaqstannyń aımaqtyq qana emes, jahandyq deńgeıde de kóshbasshy bola alatyn birqatar salalaryn aıqyndady. Respondentterdiń pikirinshe, eldiń eń perspektıvaly TOP-5 damý baǵyty mynadaı:
- Agroónerkásiptik sektor – 38,9%.
- Tsıfrlandyrý jáne jasandy ıntellekt – 30,6%.
- Energetıka – 25,3%.
- Kólik jáne tranzıt – 17,5%.
- Adamı kapıtaldy damytý – 13,1%.
Respondentterdiń pikirinshe, qazirgi kezeńde osy bes strategııalyq mańyzdy baǵyttyń damýy elimizdi álemdik deńgeıdegi jetekshi oryndarǵa shyǵaryp, turaqty ekonomıkalyq ósim men tehnologııalyq ilgerileýdi qamtamasyz ete alady.
Jalpy alǵanda, áleýmettanýlyq saýalnama nátıjeleri búgingi tańda qazaqstandyq qoǵam eldegi oń ózgeristerdi aıqyn baıqap otyrǵanyn kórsetedi. Azamattar júrgizilip jatqan reformalardyń naqty nátıjelerin óz ómirlerinen sezinýde. Bul óz kezeginde halyqtyń memlekettik saıasatqa degen senimin kúsheıtip, eldiń bolashaǵyna qatysty optımızmdi arttyrady.
Aıta keteıik, qazaqstandyqtardyń 80% LGBT nasıhatty zańmen shekteýdi qoldaıdy.