Qazaqstandyq jasóspirimder V Azııa Para oıyndarynda 68 medal jeńip aldy
ASTANA. KAZINFORM — Dýbaı qalasynda ótken jasóspirimder arasyndaǵy V Azııa Para oıyndary óz máresine jetti, dep habarlaıdy Týrızm jáne sport mınıstrliginiń baspasóz qyzmeti.
Jarys qorytyndysy boıynsha Qazaqstan quramasy 68 medal jeńip aldy. Onyń ishinde 25 altyn, 23 kúmis jáne 20 qola júlde bar. Jalpy medaldyq esepte qazaqstandyq komanda 45 memlekettiń ishinde 5-shi orynǵa turaqtady.
Atalǵan jarysta Qazaqstan atynan 60 sportshy 9 sport túri boıynsha synǵa tústi. Jarys barysynda para júzýden 34 medal, para qol kúresinen 11 medal, para ústel tennısinen 7 medal, para jeńil atletıkadan 6 medal jáne para paýerlıftıngten 6 medal jeńip alyndy.
Sonymen qatar golboldan ulttyq qurama altyn medalǵa, bochchadan kúmis medalǵa, al para taekvondodan bir kúmis jáne bir qola medalǵa qol jetkizdi. Para sadaq atýdan Qazaqstan atynan bir sportshy qatysyp, bul sport túri boıynsha júlde tirkelgen joq.
— Jasóspirimder arasyndaǵy V Azııa Para oıyndarynda elimizdiń sportshylary jaqsy nátıje kórsetti. Bul jetistik — memlekettik qoldaýdyń, bapkerler men medıtsınalyq personaldyń, sondaı-aq ata-analardyń birlesken eńbeginiń jemisi. Sonymen qatar, bul oıyndar jas sportshylar úshin halyqaralyq arenada tájirıbe jınaýǵa, halyqaralyq klassıfıkatsııadan ótýge jáne óz nátıjelerin odan ári jaqsartýǵa múmkindik beretin mańyzdy jarys boldy, — dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń sport basqarmasynyń basshysy Qaırat Seıtbekov.
Aıta keteıik, jasóspirimder arasyndaǵy V Azııa Para oıyndary 10–13 jeltoqsan aralyǵynda Dýbaı qalasynda (BAÁ) ótti. Jarysqa 45 elden 1300-den astam sportshy qatysyp, 11 sport túri boıynsha 481 medal jıyntyǵy sarapqa salyndy.
Budan buryn Shymkent quramasy Qazaqstan boks federatsııasy kýbogynyń ıegeri atanǵanyn jazdyq.