Qazaqstandyq jasóspirim tennısshiler Qaraǵandydaǵy týrnırde tórt tıtýldy jeńip aldy

ASTANA. KAZINFORM — Qaraǵandy qalasynda 14 jasqa deıingi jasóspirimder arasynda Azııa tennıs federatsııasynyń (ATF) ATF 14&under Karaganda G2 (4) halyqaralyq týrnıri aıaqtaldy.

Qazaqstandyq jasóspirim tennısshiler Qaraǵandydaǵy týrnırde tórt tıtýldy jeńip aldy
Foto: QTF

Jarys qorytyndysy boıynsha qazaqstandyq tennısshiler jekeleı jáne juptyq syndarda tórt chempıondyq ataqtyń barlyǵyn jeńip aldy.

Qazaqstan tennıs federatsııasynan málim etkenindeı, uldar arasyndaǵy jekeleı synda Mıhaıl Kım jeńimpaz atandy. Ol juptyq básekede de úzdik nátıje kórsetip, otandasy Jantóre Bólekbaevpen birge chempıondyq ataqty ıelendi. Osylaısha, Mıhaıl Kım bir týrnırde qos birdeı tıtýlǵa qol jetkizdi.

Qyzdar arasyndaǵy jekeleı synda Mılana Podlesnaıa top jardy. Qazaqstandyq tennısshi týrnır barysynda qarsylastaryna birde-bir set bermesten úzdik shyqty.
Qyzdar arasyndaǵy juptyq synda qazaqstandyq Marııa Akatova men Krıstına Bervınova jeńiske jetip, el qorjynyna taǵy bir chempıondyq ataq qosty.

Osylaısha, Qazaqstan jasóspirimderi halyqaralyq týrnırdiń barlyq tórt sanatynda jeńimpaz atanyp, óz alańynda joǵary daıyndyq deńgeıin kórsetti.

Eske sala keteıik, budan buryn qazaqstandyq jas tennısshiniń Ózbekstandaǵy jarysta top jarǵanyn jazǵan edik.