Qazaqstandyq jas tennısshiler halyqaralyq jarystarda jeńimpaz atandy
ASTANA. KAZINFORM – Qazaqstandyq jas tennısshiler halyqaralyq týrnırlerde tabysty óner kórsetti.
Qazaqstan tennıs federatsııasynyń baspasóz qyzmetinen málim etkenindeı, Kaırda birinshi sanattaǵy J500 ITF Juniors jarysynda Asyljan Arystanbekova men Sonıa Jıenbaeva juptyq synda úzdik shyqty.
Qazaqstandyqtar fınalda dodanyń 2-raketkalary, serbııalyq Teodora Kostovıch – chehııalyq Lıýsı Ýrbanovany qapy qaldyrdy – 6:1, 7:5.
14 jasqa deıingiler arasynda da qazaqstandyqtar erekshe kózge tústi. Rodıon Traıgel Túrkııada Tennis Europe Soul Cup týrnıriniń absolıýtti chempıony atandy. Ol jekeleı synda sońǵy básekede grýzııalyq Zýka Kasheshvılıdi oısyrata utty – 6:0, 6:1. Al Ańsar Nıetqalıevpen birge juptyq synda bolgarııalyqtar Gorgıev – Tzonkovtan aılasyn asyrdy – 6:3, 7:5.
Temirlan Jantemirov Polshada TE Kozerki Cup by HEAD dodasynda jekeleı synda tek fınalda ǵana fın Adam Naparıge jol berdi – 3:6, 1:6. Esesine Temirlan juptyq synda chempıon boldy.
Ámir Omarhanov pen Danıal Rahmatýllaev Ońtústik Amerıkadaǵy saparyn jalǵastyrýda. Qazaqstandyq tennısshiler ITF GSPDF Team quramynda týrǵa shaqyrtý alǵan bolatyn. Buǵan deıin mundaı dodaǵa Dıas Dosqaraev, Irına Sılıýtına, Sandýǵash Kenjebaeva qatysqan edi. Ótken aptada Asýnsonda J300 týrnırinde Ámir jartylaı, Danıal shırek fınalǵa deıin jetti. Osy aptada Á.Omarhanov pen D.Rahmatýllaev Portý-Alegrıde (Brazılııa) dál osyndaı jarysta baq synaıdy.
Eske sala keteıik, budan buryn Dmıtrıı Popkonyń AQSh-taǵy taǵy bir týrnırdiń jeńimpazy atanǵanyn jazǵan bolatynbyz.
Elena Rybakına álemdik reıtıngide tórtinshi ornyn saqtap qaldy.
