Qazaqstandyq jas tennısshi Dýbaıdaǵy jarystyń fınalyna deıin jetti

ASTANA. KAZINFORM — Dýbaı qalasynda (BAÁ) jasóspirimder arasynda ITF Juniors J60 týrnıri máresine jetti.

Atalǵan dodada 17 jastaǵy qazaqstandyq Ivan Ponomarev juptyq synda sátti óner kórsetip, fınalǵa deıin jetti.

Sońǵy básekede I.Ponomarev ózbekstandyq Ahmadjon Toshmýhamedovpen birge reseılikter Nıkıta Berdın — Danııl Tkachenkomen chempıondyq ataqty sarapqa saldy.

Qazaqstandyq-ózbekstandyq tartysty matchta sýper taı-breıkte ǵana qarsylastaryna ese jiberdi — 2:6, 6:1, 8:10.

Fınaldaǵy jeńiliske qaramastan, Ivan úshin bıylǵy maýsym tabysty boldy. Ol ITF Juniors jarystarynda eki tıtýldy jeńip aldy. Oǵan qosa juptyq synda eki ret fınalda óner kórsetti.

I.Ponomarev — Almaty qalasyndaǵy Gorky Tennis Park tennıs ortalyǵynyń túlegi.

— Ótip bara jatqan maýsym men úshin jarqyn da paıdaly boldy. Sheberlikti jetildirýge bolady, aıqyn maqsat bar. Turaqty qoldaý kórsetip, maǵan sengen bapkerim, Belarýs ókili ıAroslav Shıloǵa rııasyz alǵysymdy bildiremin. Qoldaý-kómegin aıamaıtyn ata-anama da myń alǵys, — dedi oıynnan keıin I.Ponomarev.

Eske sala keteıik, budan buryn Ámir Omarhanovtyń Týnıstegi týrnırdiń jartylaı fınalyna ótkenin jazǵan edik.