Qazaqstandyq jas tennısshi Barselonadaǵy jarystyń jartylaı fınalyna shyqty
ASTANA. KAZINFORM – Qazaqstandyq Tomırıs Nurjan Barselonada 16 jasqa deıingiler arasynda ótip jatqan Ispanııa ulttyq chempıonatynyń (Campeonato de España Iberdrola de Tenis Cadete Femenino 2025) jartylaı fınalyna ótti.
Ispanııanyń úzdik jas tennısshileri óner kórsetip jatqan jarysqa Tomırıs Nurjan uıymdastyrýshylardan arnaıy shaqyrtý alǵan edi.
Dodanyń eń tartysty matchtarynyń biri shırek fınalda boldy. Tomırıs Ispanııanyń 16 jasqa deıingiler arasynda 2-raketkasy Anna Orlandony 6:1, 4:6, 7:5 esebimen tize búktirdi.
Qazaqstandyq jas sportshy fınalǵa shyǵý úshin Paýla Peneramen talasady.
- Oıyn óte tartysty boldy, báseke bes saǵatqa sozyldy. Bapkerim usynǵan taktıka men strategııanyń arqasynda jeńiske jettim. Jumabek Janyqulov pen Next Level komandama senimi men qoldaýy úshin alǵysymdy aıtqym keledi, - dedi Tomırıs.
Eske sala keteıik, budan buryn Aleksandr Býblıktiń Germanııadaǵy jarystyń jartylaı fınalyna ótkenin jazǵan bolatynbyz.
Berlın týrnırinde Rybakına álemniń 1-raketkasyna ese jiberdi.