Qazaqstandyq jas shahmatshylar elge tarıhı jeńis syılady

ASTANA. KAZINFORM – Týrızm jáne sport mınıstri Erbol Myrzabosynov 11-15 maýsym kúnderi Londonda Halyqaralyq shahmat federatsııasy (FIDE) aıasynda ótken blıts shahmattan komandalyq álem chempıonatynda kúmis júldege ıe bolǵan Qazaqstan ulttyq quramasynyń múshelerimen kezdesti.

Jyldam jáne blıts shahmattan uıymdastyrylǵan komandalyq álem chempıonatyna álemniń túkpir-túkpirinen 52 komanda qatysty. Qazaqstan quramasy dúbirli dodada úzdik nátıje kórsetip, komandalyq esepte kúmis júldeni ıelendi. Sonymen qatar jekeleı synda 6 júlde, onyń ishinde 2 altyn medal jeńip aldy.

Kezdesý barysynda mınıstr Qazaqstan komandasynyń jetistigin tarıhı oqıǵa dep atap, otandyq shahmat mektebiniń joǵary deńgeıde damyp kele jatqanynyń aıqyn kórsetkishi ekenin aıtty.

«Memleket basshysy buqaralyq sportty damytý máselesin únemi basty nazarda ustap keledi. Sizderdiń bul jeńisterińiz – jeke jetistik emes, búkil Qazaqstan halqy úshin zor maqtanysh. Sizder elimizdi álemniń úzdik shahmat ujymdarymen terezesi teń ekenin dáleldedińizder», – dedi Erbol Myrzabosynov.

Halyqaralyq arenada el namysyn abyroımen qorǵap, joǵary nátıje kórsetkeni úshin Aldııar Ańsat, Elnaz Qalıahmet jáne Islam Aıtenge mınıstrdiń alǵys haty tabystaldy. Sondaı-aq ishki erejege sáıkes, úzdik nátıje kórsetken sportshylardy yntalandyrý maqsatynda árqaısysyna aqshalaı sertıfıkattar berildi.

Shahmat sportyn damytýǵa qosqan úlesi úshin Qazaqstan shahmat federatsııasynyń prezıdenti Tımýr Týrlov «Qurmetti sport qyzmetkeri» tósbelgisimen marapattaldy.

«Kez kelgen jetistik – bul jaı ǵana sporttyq nátıje nemese jeke jeńis emes, memlekettiń júıeli qoldaýynyń naqty kórinisi ekenin jaqsy túsinemiz. Biz bul qoldaýdy ár kezeńde sezinip kelemiz: balalar shahmatyn damytýdan bastap, elimizde iri halyqaralyq týrnırlerdi uıymdastyrýǵa deıin. Bul bizge erekshe serpin beredi, jigerlendiredi ári aldaǵy bıik maqsattardy aıqyndaýǵa jol ashady», – dedi Tımýr Týrlov.

2025 jyldyń alǵashqy jartyjyldyǵynda otandyq shahmatshylar halyqaralyq deńgeıdegi jarystarda 81 medal jeńip aldy. Onyń ishinde 34-i – altyn, 21-i – kúmis, 26-sy – qola. Bul – elimizde shahmat sportyn damytý isi júıeli júrgizilip jatqanyn jáne elimizdiń básekege qabilettiliginiń artyp kele jatqanyn aıqyn kórinisi.

Aıta keteıik, shahmattan álem chempıony ChatGPT-di oısyrata jeńdi.