Qazaqstandyq jas robototehnıkter álemniń úzdik tórttigine endi
ASTANA. KAZINFORM — Álemniń 185 elinen jınalǵan komandalar arasynda qazaqstandyq oqýshylar úzdik tórttikten kórindi.
Koreıa Respýblıkasynyń Inchhon qalasynda ótken FIRST Global Challenge 2026 halyqaralyq robototehnıka chempıonatynda ulttyq qurama irikteý kezeńindegi 11 kezdesýdiń barlyǵynda jeńiske jetti. Osylaısha, qorytyndy reıtıngte tórtinshi orynǵa turaqtady.
Qazaqstan quramasy buǵan deıin tórt jyl qatarynan chempıon atanǵan. Bıylǵy nátıje de otandyq jas ınjenerlerdiń halyqaralyq deńgeıde básekege qabiletti ekenin baıqatty.
Ulttyq qurama sapynda Almatydaǵy Mahatma Gandı atyndaǵy № 92 mektep-lıtseıiniń oqýshylary Hýseın Maqsut pen Arnur Abdýlla da óner kórsetti.
Búgin oqýshylar, robototehnıkadan joba jetekshisi Nursultan Ergeshpen birge Jibek Joly telearnasynyń «Búgin.LIVE» baǵdarlamasynda tikeleı baılanysqa shyǵyp, suqbat berdi.
Ulttyq qurama álemdik kezeńge joldama alý úshin aldymen Ortalyq Azııadaǵy irikteý kezeńine qatysyp, 40 komandanyń arasynan úzdik shyqqan.
— FIRST chempıonatynyń baǵyttary kóp. Biz solardyń ishindegi eń kúrdeli jarystardyń biri — Global Challenge saıysyna qatystyq. Álemdik deńgeıdegi jarysqa joldama alý úshin aldymen Ortalyq Azııa irikteýinen óttik. Oǵan elimizden 40 komanda qatysty. Jarysta birinshi oryn alǵan komanda ǵana álemdik kezeńge joldama alady. Biz irikteýde jeńiske jetip, joldama aldyq. Odan keıin Inchhon qalasynda ótken jarysta óner kórsettik, — dedi joba jetekshisi.
Bul chempıonattyń ereksheligi — robotty tek uıymdastyrýshylar usynǵan quraldar men bólshekterdi paıdalanyp qurastyrý qajet eken. Qosymsha bólshekterdi qoldanýǵa ruqsat joq.
— Biz 11 kezdesýdiń bárinde de jaqsy nátıje kórsettik. Degenmen jarys ońaı bolǵan joq. Matchtar ár saǵat saıyn ótip otyrdy. Onyń ústine, oıyn bastalǵanǵa deıin qarsylasymyzdyń qaı komanda bolatynyn bilmeımiz. Qarsylastar kezdeısoq anyqtalady. Bir-birimizge qoldaý kórsetip, ár kezeńnen óttik. Bul biz úshin eń qıyn jarystardyń biri boldy, — dedi komanda jetekshisi Nursultan Ergesh.
Robottyń basty artyqshylyǵy — dopty tez jınaý múmkindigi
Komanda múshesi Arnurdyń aıtýynsha, olar qurastyrǵan robot doptardy jınap, belgilengen baǵytqa laqtyrady. Sonymen qatar arnaıy mehanızmniń kómegimen robot 30 sekýnd ishinde joǵary kóteriledi.
— Robotta arnaıy climb mehanızmi bar. Bul mehanızm hemp arqyly kóterilýge múmkindik beredi, — dedi ol.
Al Hýseın Maqsut jarystyń qyzyqty bolǵanyn, sonymen qatar tyńǵylyqty daıyndyq pen komandalyq úılesimdilikti qajet etkenin aıtty.
— Jarys maǵan unady, biraq qıyn boldy. Keıbir qarsylastarymyzdyń daıyndyǵy osal boldy. Biz ózimizdi barlyq jaǵynan jaqsy kórsete aldyq, — dedi Hýseın.
Onyń aıtýynsha, ózge komandalardyń robottary da tyń ınjenerlik sheshimderimen erekshelengen. Al ulttyq qurama dopty kóp jınap, laqtyrýǵa múmkindik beretin mehanızmge basymdyq bergen.
— Qarsylastarymyzdyń arasynda Ózbekstan komandasynyń roboty da myqty boldy. Ol shaǵyn ári jyldam edi. Al bizdiń robot úlkendeý boldy. Jalpy, robotty yqsham etip qurastyrǵan durys ekenin túsindik. Sonda ol jyldamyraq jumys isteıdi, — dedi Hýseın.
Komandalyq jumys — jetistiktiń negizi
Komanda jetekshisiniń pikirinshe, robototehnıka jarystarynda mindetterdi durys bólý de mańyzdy.
— Bes oqýshydan quralǵan komandada ár qatysýshynyń óz jaýapkershiligi bar. Eki oqýshy robotty basqarsa, bireýi baǵdarlamalyq kod jazady, al qalǵan ekeýi robotty qurastyrady. Máselen, Arnur robottyń ınjenerlik mehanızmderin ázirlep, ony qurastyrýmen aınalysady. Al Hýseın ınjenerlik qujattamany daıyndaıdy. Osylaısha, komanda músheleri ózara tájirıbe almasyp, ortaq nátıjege jumys isteıdi, — deıdi ol.
Onyń aıtýynsha, elimizde robototehnıka salasy qarqyndy damyp keledi. Bul baǵyttaǵy básekelestik te joǵary.
Sondyqtan halyqaralyq jarystarǵa qatysý oqýshylarǵa óz múmkindikterin synap qana qoımaı, ózge komandalardyń ınjenerlik sheshimderin zerdeleýge múmkindik beredi.
Aıta keteıik, jaqynda Qazaqstandyq oqýshylar Beıjińdegi robototehnıka chempıonatynda kúmis júlde jeńip aldy.
