Qazaqstandyq jas robototehnıkter álemniń úzdik tórttigine endi
ASTANA. KAZINFORM — Qazaqstan ulttyq quramasy Koreıa Respýblıkasynyń Inchhon qalasynda ótken FIRST Global Challenge 2026 halyqaralyq sporttyq robototehnıka chempıonatynda álemdik reıtıngtiń úzdik tórttigine endi. Baıqaýǵa álemniń 185 elinen komandalar qatysty. Bul týraly Oqý-aǵartý mınıstrligi málim etti.
Qazaqstandyq oqýshylar irikteý kezeńindegi 11 kezdesýdiń barlyǵynda jeńiske jetip, pleı-off kezeńine joldama aldy. Jarys qorytyndysy boıynsha ulttyq qurama álemdik reıtıngte tórtinshi orynǵa ıe bolyp, ınjenerlik daıyndyq pen komandalyq jumystyń joǵary deńgeıin kórsetti.
Qazaqstan quramasy buǵan deıin tórt jyl qatarynan FIRST Global Challenge chempıonatynyń jeńimpazy atanǵan bolatyn. Bıylǵy nátıje de otandyq oqýshylardyń halyqaralyq arenadaǵy básekege qabilettiligin taǵy bir márte dáleldedi.
Ulttyq qurama sapynda Almaty qalasyndaǵy M. Gandı atyndaǵy №92 mektep-lıtseıiniń 9–11-synyp oqýshylary Hýseın Maqsut, Nurtas Serik, Aspandııar Berdalı jáne Arnýr Abdýlla, sondaı-aq Y. Altynsarın atyndaǵy №159 gımnazııasynyń oqýshysy Erasyl Endibaı óner kórsetti.
Ulttyq qurama Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵy men USTEM Foundation qoǵamdyq qory birlesip uıymdastyrǵan irikteý nátıjesinde jasaqtaldy. Bul jumysqa Jasandy ıntellekt jáne tsıfrlyq damý mınıstrligi, Astana Hub halyqaralyq ınnovatsııalyq klasteri qatysyp, Astana Motors quramyndaǵy OMODA & JAECOO brendteri qoldaý kórsetti.
Buǵan deıin qazaqstandyq oqýshylar Shanhaıdaǵy VEX Robotics týrnırinde úsh júldeni jeńip alǵan bolatyn.
