Qazaqstandyq jas padelshiler halyqaralyq týrnırde top jardy
ASTANA. KAZINFORM — Padelden Qazaqstan jasóspirimder quramasynyń músheleri Arnur Tursynhan men Islam Dúısenǵazın Indonezııada máresine jetken FIP Promises Bali týrnırinde sátti óner kórsetti.
Qazaqstandyq dýet 16 jasqa deıingiler arasynda fınalda kort ıeleri Pýrvako Etsıo – Rıtesha Gılany 6:1, 6:4 esebimen tize búktirdi.
Arnur men Islam 18 jasqa deıingiler arasynda da tabysty oınaı bildi. Qazaqstandyqtar fınalda ındonezııalyqtar Baı Pýtrajatı – Roı Soesılomen chempıondyq ataqty sarapqa saldy. Birinshi sette qazaqstandyqtar 6:4 esebimen basymdylyq tanytty. Ekinshi partııada ındonezııalyqtar taı-breıkte sátti oınady – 7:6 (7:2). Sýper taı-breıkte jeńis jergilikti padelshilerdiń enshisinde ketti – 11:9.
Qazaqstandyq dýet bıyl maıda FIP Promises Tbilisi jarysynda 16 jáne 18 jasqa deıingiler arasynda top jarǵan edi. Sodan keıin shildede FIP Promises Jakarta osy nátıjelerin qaıtalady.
Oıynshylarmen Indonezııaǵa birge barǵan padelden Qazaqstan erler quramasynyń bas bapkeri Tımýr Habıbýlın jastardyń tabysy júıeli jumys jemisi ekendigin atap ótti.
- Arnur men Islam eki jas ereksheligine qaraı birneshe jarys boıy joǵary oryndar úshin kúresip keledi. Olardyń ózderinen jasy úlkendermen taıtalasýǵa qoryqpaıtyny erekshe súısindiredi. Árıne, bul joly da eki altyn medal alǵymyz kelgen. Degenmen 18 jasqa deıingiler arasyndaǵy kúmis júlde de jaqsy nátıje bolyp esepteledi. Eń bastysy, turaqtylyq, minez, jeńiske degen jiger bar. Mundaı týrnırler olarǵa tájirıbe jınaqtap, aldaǵy jarystarda senimdi oınaýǵa járdemdesedi, - dedi T.Habıbýlın.
Osy tabysy nátıjesinde Arnur Tursynhan men Islam Dúısenǵazın 16 jasqa deıingiler arasynda FIP Promises Azııa reıtıngisinde 4-orynǵa kóterildi. Al 18 jasqa deıingiler arasynda 6-satyǵa jaıǵasty. Bul ekeýiniń úzdik kórsetkishteri bolyp esepteledi.
Eske sala keteıik, budan buryn qazaqstandyq jas padelshilerdiń Azııa reıtıngisinde úzdik ondyqqa kirgenin jazǵan edik.
