Qazaqstandyq jas padel sheberleri Indonezııadaǵy týrnırde top jardy
ASTANA. KAZINFORM — Indonezııada padelden FIP Promises Jakarta halyqaralyq týrnıri máresine jetti.
Aıtýly dodada padelden Qazaqstan jasóspirimder quramasynyń músheleri Arnur Tursynhan men Islam Dúısenǵazın úzdik óner kórsetip, qos birdeı jas sanatynda úzdik shyqty.
Qazaqstandyq dýet 18 jasqa deıingiler arasynda fınalda kort ıeleri Ýgo Daman — Zafa Ýtamaǵa birde-bir geım bergen joq — 6:0, 6:0.
Arnur men Islam 16 jasqa deıingiler arasynda da qarsylas shaq keltirmedi. Olar sońǵy básekede ındonezııalyqtar Djoshýa Sıgalınga — Etsıo Pervokkony 6:2, 6:3 esebimen tize búktirdi.
Bul qazaqstandyq jas padel sheberleriniń FIP Promises serııasy jarystaryndaǵy qatarynan ekinshi jeńisi edi. Bıyl mamyr aıynda Tbılısıde Arnur Tursynhan men Islam Dúısenǵazın dál sondaı dodada qos birdeı jas sanatynda top jarǵan edi.
Padelden Qazaqstan ulttyq erler quramasynyń bas bapkeri Tımýr Habıbýlın bul tabysty zańdy nátıje, tókken terdiń jemisi retinde baǵalady.
— Arnur men Islam týrnır barysynda saýatty da senimdi oınaı bildi. Ásirese, olar FIP Promises sanatyndaǵy ekinshi týrnırde sheberlikteriniń joǵary deńgeıde ekendigin dáleldedi. Qazaqstandyq padel úshin bul — mańyzdy nátıje. Bul jastarymyzdyń halyqaralyq arenada básekege túse alatynyn kórsetedi. Osy baǵytta jumystana bermekpiz, — dedi T.Habıbýlın.
Eske sala keteıik, budan buryn Almatyda padelden Qazaqstan alǵashqy chempıonatynyń jeńimpazdary anyqtalǵanyn jazǵan edik.
